Përplasje në KPK: Prokuroria Speciale ndër më joefikaset, Kryeprokurori mohon shuarjen

Një raport krahasimor për efikasitetin e prokurorive e ktheu mbledhjen e sotme të Këshillit Prokurorial të Kosovës (KPK) në përplasje të hapur. Sipas raportit të publikuar nga vetë Këshilli, Prokuroria Speciale, e drejtuar nga Blerim Isufaj, renditet ndër prokuroritë me efikasitetin më të dobët brenda sistemit prokurorial të vendit.

I pari që e kundërshtoi ishte Milot Krasniqi, anëtar i KPK-së dhe prokuror që përfaqëson Prokurorinë Speciale në Këshill. Ai e cilësoi raportin si pjesë të një tendence për ta goditur dhe për ta shuar këtë prokurori. Sipas tij, mosmiratimi i punës, kthimi për plotësim dhe statistikat krahasimore "bëhen qëllimshëm që të paraqitet si Prokurori e dështuar apo për t’u riprofilizuar apo shuar e gjitha si prokurori, apo të krijohet një prokurori e re siç qarkullojnë fjalë në publik".

Krasniqi kujtoi se edhe në mbledhjen ku raportoi Kryeprokurori, një anëtar që vjen nga shoqëria civile kishte paralajmëruar se Specialja do të dilte më e dobëta. Për të shpjeguar ngarkesën e prokurorisë, ai përmendi ndryshimet ligjore të vitit 2023, të cilat sipas tij i ngarkuan Speciales vepra që ndryshe mund të mos i trajtonte fare, si dhe lëndët për mosdeklarim apo deklarim të rremë të pasurisë, ku deri në fund të vitit të kaluar ishin përfshirë gjyqtarë, prokurorë e të tjerë. Përfundimi i tij ishte i prerë: "Mënyra se si u paraqit raporti, unë do të votoj kundër".

Në drejtim krejt tjetër shkoi një tjetër anëtar i KPK-së, Visar Krasniqi. Ai deklaroi se joefikasiteti i Speciales është rezultat i keqmenaxhimit, një vërejtje që u lexua si e drejtuar ndaj udhëheqësit të saj, Isufaj.

Kryeprokurori i Shtetit, Zejnulla Gashi, ndërhyri për të mbyllur spekulimet për fatin e institucionit. "Ajo nuk qëndron, të siguroj si Kryeprokuror i Shtetit sistemin prokurorial që Prokuroria Speciale jo që nuk do të shuhet, por do të mbështetet e do të avancohet", tha ai, duke përmendur edhe bashkëpunimin juridik ndërkombëtar me partnerët, "sidomos ata amerikanë e britanikë". Gashi shtoi: "Tendenca për konstatime e përfundime të tilla që Prokuroria Speciale do të shuhet është e papranueshme. Ne kemi marrë pjesë personalisht në draftimin e ligjit për Prokurorinë Speciale." Ai u bëri thirrje anëtarëve të kursehen nga qëndrime të tilla, të cilat sipas tij dëmtojnë sistemin.

Milot Krasniqi u përgjigj se nuk kishte nxjerrë ndonjë përfundim personal. "Unë nuk konstatova asgjë, unë vetëm i thashë disa fjalë të cilat qarkullojnë në publik", tha ai, duke shtuar se "Me çdo kusht do ta mbrojë Prokurorinë Speciale dhe gjithë sistemin prokurorial".

Kreu i KPK-së, Arian Gashi, mbrojti gjetjet e raportit. "Duhet të kemi kujdes dhe si prokurorë s’duhet të shërbehemi me thashetheme në rrugë", tha ai, duke theksuar se "Mund të mos jemi ithtarë të statistikave, por ato tregojnë se si kemi funksionuar." Sipas tij, Specialja nuk ka treguar efikasitet të mirë në raportin paraprak dhe një vlerësim të tillë jo të mirë të performancës e ka dhënë edhe OSBE-ja në raportin e saj të fundit.