Përplasje mes punëtorëve të rent-a-car në Aeroportin "Adem Jashari", njëri ndalohet 48 orë

Dy operatorë të kompanive të ndryshme rent-a-car u përplasën dy herë brenda së njëjtës ditë në Aeroportin Ndërkombëtar "Adem Jashari", në një zinxhir ngjarjesh që nisi me fyerje në terminal dhe përfundoi me një sulm fizik e me një urdhër ndalimi 48-orësh.

Incidenti i parë ndodhi më 13 shtator, rreth orës 17:20. L.D., 33-vjeçar nga Fushë Kosova dhe i angazhuar në një kompani rent-a-car, po priste një klient në aeroport kur iu afrua V.Sh., 35-vjeçar nga Vrella e Goleshit, i cili operon me një biznes rent-a-car në afërsi të aeroportit. Sipas deklarimit të ankuesit, tjetri nisi ta fyejë dhe më pas e thirri të dilte jashtë terminalit. Gjatë përplasjes verbale, i dyshuari dyshohet se e shtyu ankuesin me duar.

Ankuesi nuk doli nga terminali, por njoftoi Policinë. Në rast u përfshi Policia Kufitare e Aeroportit, e cila fillimisht i arrestoi të dy personat dhe i shoqëroi për procedura të mëtejshme.

Tensionet nuk u shuan as gjatë shoqërimit. Sipas të dhënave të rastit, i dyshuari vazhdoi me fyerje dhe shprehje banale ndaj ankuesit dhe vëllait të tij, në prani të një zyrtareje policore. Pas përfundimit të procedurave fillestare, të dy u liruan në procedurë të rregullt.

Kthimi i tyre sërish në aeroport prodhoi një konflikt të dytë, që i ndryshoi rrjedhën rastit: kësaj radhe 35-vjeçari dyshohet se e sulmoi fizikisht 33-vjeçarin në hapësirat e aeroportit. Pas njoftimit për sulmin, Prokurori i Shtetit urdhëroi ndalimin e tij për 48 orë.

Të dyshuarit prezumohen të pafajshëm derisa fajësia të mos provohet me vendim të formës së prerë nga gjykata.