Përplasje me tri vetura në rrugën “Mbretëresha Teutë” në Pejë, gjashtë të lënduar

Gjashtë persona kanë pësuar lëndime trupore në një aksident trafiku që ndodhi mbrëmjen e sotme në rrugën “Mbretëresha Teutë” në Pejë, ku u përplasën tri vetura.

Zëdhënësi i Policisë në Pejë, Driton Rugova, tha se aksidenti ndodhi rreth orës 18:35 dhe se të lënduarit u transportuan menjëherë në Spitalin Rajonal.

“Policia është njoftuar për një aksident trafiku i cili ka ndodhur në rrugën ‘Mbretëresha Teutë’ në Pejë. Në këtë aksident ishin të involvuara tri vetura dhe si pasojë e aksidentit gjashtë persona kanë pësuar lëndime trupore. Të njëjtit janë dërguar në Spitalin Rajonal për tretman mjekësor”, deklaroi Rugova.

Shkaku i përplasjes mbetet ende i papërcaktuar. Policia e Pejës ka marrë rastin në trajtim dhe po heton rrethanat në të cilat tri automjetet përfunduan në përplasje.