Përmbaruesit marrin mjetet, punëtorët e kujdesit paliativ në Prishtinë dy muaj pa paga

Dy muaj pune pa asnjë pagë. Kjo është gjendja e punëtorëve të Shërbimit Paliativ në Komunën e Prishtinës, të cilët, edhe pse janë ankuar, ende nuk i kanë marrë pagat.

Në të njëjtën situatë janë edhe punëtorët e angazhuar në projektin komunal për gratë shtatzëna. Drejtori i Shëndetësisë në Komunën e Prishtinës, Bujar Gashi, e lidh vonesën me mungesën e parave në kategorinë buxhetore "mallra dhe shërbime", nga e cila, sipas tij, një pjesë e mjeteve është marrë nga përmbaruesit.

"Arsyeja pse nuk kanë marrë pagat janë dy projekte, projekti për kujdes paliativ dhe projekti për gratë shtatzëna. Arsyeja pse nuk janë paguar muajin e kaluar është mungesa e mjeteve në kategorinë mallra dhe shërbime, që janë marrë nga përmbaruesit", tha Gashi.

Drejtori thotë se me punëtorët janë mbajtur takime dhe se atyre u është shpjeguar situata. Megjithatë, ai e kalon zgjidhjen te Drejtoria e Financave, duke theksuar se çështja lidhet me kompetencat e saj.

Gashi shprehet optimist se pagat e mbetura do të paguhen pas alokimit të mjeteve në fillim të muajit, por e lidh këtë drejtpërdrejt me ardhjen e parave: "Presim në këtë fillim të muajit, nëse do të ketë alokim të mjeteve, që të mund t’i paguajmë pagat e tyre. Shpresoj që këtë fillim muaji kanë me i marrë".