Përleshje mes shqiptarëve dhe algjerianëve në burgun e Domokosit, gjashtë të plagosur

Gjashtë persona u plagosën pasditen e djeshme në burgun e Domokosit, në prefekturën Ftiotis në pjesën qendrore të Greqisë, pas një përleshjeje të dhunshme mes të burgosurve shqiptarë dhe algjerianë. Njëri prej tyre ndodhet në gjendje të rëndë.

Të plagosurit, të moshave nga 26 deri në 41 vjeç, u dërguan fillimisht në Qendrën Shëndetësore të Domokosit. Katër prej tyre u transferuan më pas në Spitalin e Lamias, në qendër të prefekturës.

Më i rëndi është një i burgosur me plagë të rënda në kokë, i cili iu nënshtrua menjëherë një operacioni. Gjendja e tij shëndetësore mbetet e rëndë. Një tjetër i burgosur, i goditur me një thikë të improvizuar, e ka kaluar rrezikun për jetën pas ndërhyrjes së mjekëve.

Sipas mediave greke, shkaku i përleshjes ende nuk dihet. Ngjarja nuk është e veçuar: brenda një muaji e gjysmë, ky është incidenti i tretë i ngjashëm në të njëjtin burg.