Përleshja në pazarin e Beranës: kapet edhe i shtati i dyshuari, ndiqej nga policia

I dyshuari i shtatë, që deri mbrëmë ndiqej nga policia, tashmë është pas hekurash. Uprava e Policisë së Malit të Zi njoftoi se Njësia e Sigurisë në Berane (OB Berane), me urdhër të prokurorit të Prokurorisë Themelore Shtetërore në Berane, ka arrestuar D.H. (18) për veprën penale të sjelljes së dhunshme.

Ai është personi i shtatë i identifikuar në lidhje me përleshjen që sipas policisë ndodhi një ditë më parë në pazarin e Beranës, ku u përfshinë dy grupe. Gjatë përleshjes, S.B. (19) u plagos me thikë.

Sipas policisë, dy grupet përbëheshin nga persona të ndryshëm: në njërin ishin S.B. (19), M.R. (21) dhe P.T. (18), ndërsa në tjetrin një i mitur 17-vjeçar, D.H. (18), F.S. (23) dhe V.D. (20). "Dyshohet se dje në Berane ka ardhur deri te një përleshje mes dy grupeve personash, me ç'rast S.B. (19) ka pësuar plagë nga thika", thuhet në njoftimin e policisë malazeze.

Ngjarja doli në dritë kur personeli mjekësor i Ndihmës së Shpejtë Mjekësore në Berane njoftoi shërbimin e OB Berane se ishte pranuar një person mashkull, i identifikuar si S.B. (19) nga Berana, i cili kërkoi ndihmë mjekësore për plagë në zonën e ijës së këmbës së majtë, të shkaktuara, sipas dyshimeve, nga një therje me thikë.

I mituri 17-vjeçar dyshohet për sjellje të dhunshme në bashkim me veprën penale të lëndimit të rëndë trupor ndaj S.B.. "Për shkak të dyshimit se ka kryer veprën penale sjellje e dhunshme në bashkim me veprën penale lëndim i rëndë trupor, në dëm të S.B., i cili ka pësuar plagë nga thika, është arrestuar i mituri shtatëmbëdhjetëvjeçar. Për shkak të dyshimit se kanë kryer veprën penale sjellje e dhunshme, janë arrestuar M.R., V.D., F.S., S.B. dhe P.T.", theksohet në njoftimin e policisë.

Në total, policia ka arrestuar gjashtë persona dhe ka paraqitur kallëzime penale kundër shtatë personave të përfshirë në ngjarje. Të gjithë të arrestuarit mbeten të dyshuar deri në një vendim të gjykatës.