Përleshja me armë e thika në Veternik: gjashtë të dyshuar, katër në mbajtje, tre në arrati

Katër persona janë dërguar në Qendrën e Mbajtjes në Skenderaj për 48 orë, ndërsa tre të tjerë mbeten në arrati, pas përleshjes me armë zjarri dhe thika që ndodhi në orët e para të mëngjesit të 26 shtatorit prapa lokalit "Gizzi Grill" në Veternik të Prishtinës.

Sipas informacioneve të publikuara nga Gazeta Sinjali, në dosjen e rastit figurojnë si të dyshuar gjashtë persona, mes tyre edhe të tre të rinjtë që mbetën të lënduar në përleshje. Në mbajtje kanë përfunduar P.U. (23 vjeç), Gj.G. (25 vjeç), G.O. (19 vjeç) dhe A.C., pas përfundimit të veprimeve procedurale.

Alarmi për të shtëna dhe për një person të plagosur është dhënë rreth orës 04:40. Dyshohet se pas një konflikti mes disa personave janë përdorur armë zjarri dhe mjete të mprehta. Të lënduarit u dërguan në QKUK: A.R., 21 vjeç, u qëllua me armë zjarri në të dy këmbët; G.O. pësoi lëndime nga mjeti i mprehtë në kokë dhe këmbë; ndërsa R.K., 20 vjeç, u lëndua në krahun e majtë. Asnjëri prej tyre nuk është në rrezik për jetën, por dy vazhdojnë trajtimin në Klinikën e Ortopedisë.

Dy nga të dyshuarit, P.U. dhe Gj.G., u ndaluan nga njësitë policore në Lipjan ndërsa po largoheshin drejt Ferizajt. Gjatë kontrollit, atyre u janë gjetur dhe sekuestruar një pistoletë TT dhe një thikë, si dhe vetura BMW ngjyrë e zezë me të cilën udhëtonin.

Në vendin e ngjarjes janë gjetur tri gëzhoja, dy fishekë, dy predha të dëmtuara, një thikë dhe një çelës metalik. Pamjet e kamerave të sigurisë kanë ndihmuar në identifikimin e personave të përfshirë në përleshje.

Rasti po hetohet për "Vrasje të rëndë në tentativë", "Mbajtje në pronësi, kontroll ose posedim të paautorizuar të armës", "Sulm" dhe "Pjesëmarrje në rrahje". Hetimet vazhdojnë për të sqaruar plotësisht ngjarjen dhe rolin që ka pasur secili prej të përfshirëve.

Të gjithë të dyshuarit prezumohen të pafajshëm derisa fajësia e tyre të vërtetohet me vendim të formës së prerë nga gjykata.