Qeveria kërkon autorizim nga presidentja për marrëveshjet e pensioneve me Austrinë dhe Turqinë

Qytetarët e Kosovës që kanë kaluar vite pune në Austri ose Turqi mund të mos i humbin më kontributet e paguara atje. Qeveria e Kosovës ka arritur marrëveshje me të dyja shtetet për njohjen e kontributeve personale, një hap që prek drejtpërdrejt pensionet e tyre.

Në mbledhjen e së mërkurës, kabineti qeveritar miratoi dy propozim-vendime me të cilat kërkon nga presidentja autorizimet për nënshkrimin e marrëveshjeve në fushën e sigurimeve sociale, njëra me Austrinë dhe tjetra me Turqinë. Nënshkrimi pritet të bëhet nga ministri i Punës, Andin Hoti, por data nuk është bërë ende e ditur.

Qëllimi i deklaruar i marrëveshjeve është krijimi i një baze të re ligjore për marrëdhëniet në fushën e sigurimeve sociale, e cila u garanton qytetarëve të të dyja vendeve njohjen e ndërsjellë të kontributeve për përfitimin e pensioneve.

Hoti shpjegoi se çfarë ndryshon në praktikë: "Qytetarët që kanë punuar për një kohë të gjatë në Republikën e Austrisë do të kenë të drejtë të marrin pensionet në Kosovë dhe anasjelltas kudo që ata jetojnë. Gjithashtu, qytetarëve të Kosovës do t’u njihet e drejta për t’i bashkuar periudhat e kontributeve për të realizuar pensionet".

Kjo do të thotë se periudhat e punës të kryera jashtë vendit mund të mblidhen bashkë me ato në Kosovë për të plotësuar kushtet e pensionit. Marrëveshjet hyjnë në fuqi vetëm pasi presidentja të japë autorizimet dhe dokumentet të nënshkruhen zyrtarisht.