Peleti me katër çmime: Mitrovica e Jugut rekomandon 499 euro për ton, Graçanica 380

499 euro për një ton pelet. Aq do të paguajë Komuna e Mitrovicës së Jugut nëse kontrata e rekomanduar nga administrata e kryetarit Faton Peci, i zgjedhur me mbështetjen e Lëvizjes Vetëvendosje (LVV), arrin deri në nënshkrim. Në Rahovec i njëjti produkt është kontraktuar për 400 euro, ndërsa në Graçanicë është ofruar për 380.

Tenderi mban titullin "Furnizim me lëndë djegëse Dru dhe Pelet", me numër prokurimi 642-26-5114-1-1-1, dhe ka vlerë të parashikuar prej 748,320 eurosh. Sipas dokumenteve zyrtare të prokurimit, të siguruara nga Front Online, komuna ka propozuar për kontratë grupin e operatorëve ekonomikë "BERVENIKU CORPORATION" dhe "Naser A. Hyseni" B.I., me 499 euro për ton pelet dhe 95 euro për metër kub dru.

Në listën e ofertave figuron vetëm ky grup. Megjithatë, në letrën standarde dërguar kompanive, autoriteti kontraktues ka njoftuar se oferta e tyre është vlerësuar si më e ulëta. Dokumentet tregojnë rekomandimin për dhënien e kontratës, por jo nënshkrimin e saj përfundimtar.

Krahasimi me komunat e tjera e bën dallimin të prekshëm. Komuna e Rahovecit, që drejtohet nga Smajl Latifi i AAK-së, ka kontraktuar 350 tonë pelet për 140 mijë euro, pra 400 euro për ton. Kjo do të thotë se Mitrovica e Jugut ka rekomanduar një çmim 99 euro më të lartë për çdo ton. Ndaj ofertës së rekomanduar në Graçanicë, diferenca shkon në 119 euro. Në shifra konkrete: për çdo 100 tonë, buxheti i Mitrovicës së Jugut do të paguante 9,900 euro më shumë se me çmimin e Rahovecit dhe 11,900 euro më shumë se me atë të Graçanicës.

Mitrovica e Jugut nuk është rasti më i shtrenjtë. Komuna e Podujevës, e drejtuar nga Shpejtim Bulliqi i LVV-së, ka nënshkruar kontratë prej 312 mijë eurosh për 600 tonë pelet, duke paguar 520 euro për ton. Kontrata i është dhënë kompanisë "DnA Core L.L.C.", në pronësi të një biznesmeni nga Kamenica, i cili ka pasur angazhim politik në strukturat lokale të Vetëvendosjes.

Procedura në Podujevë është zhvilluar përmes negocimit pa publikim të njoftimit për kontratë. Vlera përfundimtare doli 60 mijë euro mbi vlerën e parashikuar prej 252 mijë eurosh.

Detaji më i spikatur vjen nga Graçanica. Pelet për 380 euro për ton atje ofron një konsorcium ku bën pjesë edhe "DnA Core L.L.C.", e njëjta kompani që në Podujevë furnizon me 140 euro më shtrenjtë për ton. Kështu, e njëjta firmë shfaqet në dy procedura me çmime që ndryshojnë ndjeshëm, dhe kjo ngre pyetjen pse kostoja e lëndës djegëse për institucionet publike ndryshon kaq shumë nga një komunë në tjetrën.