Pejë: arrestohet i mituri i dyshuar për therjen me thikë të një bashkëmoshatari

Policia në Pejë ka arrestuar një të mitur, të dyshuar se me një mjet të mprehtë plagosi një bashkëmoshatar të tij në rrugën “Onufri” të qytetit, aty ku pasditen e sotme ndodhi therja.

Sheremet Elezaj, zëdhënësi i Policisë për rajonin e Pejës, shpjegoi se alarmi erdhi nga emergjenca e spitalit, ku i plagosuri kishte kërkuar ndihmë mjekësore. "Rreth orës 15:50, jemi njoftuar nga emergjenca e spitalit se një person kishte kërkuar tretman mjekësor për shkak të plagës që dyshohet se është shkaktuar nga një mjet i mprehtë. Njësitë e nevojshme policore menjëherë i janë përgjigjur rastit dhe, sipas hetimeve fillestare, dyshohet se viktima, mashkull i mitur, është sulmuar me mjet të mprehtë nga një person tjetër, po ashtu mashkull i mitur, në rrugën “Onufri” në Pejë. I dyshuari është arrestuar. Lidhur me rastin, jemi duke ndërmarrë veprimet e nevojshme hetimore në koordinim me institucionet përkatëse", tha Elezaj.

Viktima u trajtua në emergjencën e spitalit në Pejë. Policia nuk ka bërë të ditur gjendjen e tij shëndetësore, as motivin e sulmit, ndërsa hetimet vazhdojnë në bashkëpunim me institucionet përkatëse.