Pejë: 700 mijë euro dëme nga vërshimet e 2023-s, asnjë familje e kompensuar ende

Rreth 700 mijë euro dëme, të verifikuara nga Komuna e Pejës dhe të dërguara për kompensim në Qeveri, mbeten ende të papaguara tre vjet pas vërshimeve të vitit 2023. Deri më tani, asnjë nga familjet e dëmtuara nuk është dëmshpërblyer.

Goditja më e rëndë ra mbi lagjen Asllan Qeshmja. Reshjet e mëdha të shiut e nxorën nga shtrati lumin Qokolica, që rrjedh përmes lagjes, dhe uji pushtoi shtëpitë. Katet përdhese mbetën të pabanueshme, ndërsa shumë vetura u përmbytën në lumë. Sipas zyrtarëve komunalë, 60 për qind e dëmeve të ekonomive familjare në qytet i takojnë vetëm kësaj lagjeje.

"Uji ka qenë rreth një metër. Të dëmtuar kemi qenë e gjithë lagjja, por ende askush nuk kemi marrë asgjë për dëmshpërblim", tha një nga banorët.

Familjet thonë se procedurat i kanë kryer të gjitha. Zyrtarët erdhën, i panë dëmet dhe morën dokumentet. Pastaj, asgjë. "Kanë qenë ata këtu dhe e kanë vlerësuar dëmin. I kemi dhënë të gjitha dokumentet e nevojshme dhe hiç kurgjo. Shtëpia krejt ka qenë e dëmtuar", tha një banore e lagjes, shtëpia e së cilës u dëmtua nga vërshimi.

Një banor tjetër tregon se familja e tij mori edhe një letër që i premtonte kompensim. "Letra na ka ardhur për kompensim prej tre mijë eurosh dhe hiç kurgjo nuk kemi marrë", tha ai.

Pa ndihmë nga institucionet, banorët thonë se rinovimin e shtëpive e bënë me mjete vetanake. Familjarët ankohen se për fatkeqësinë që përjetuan nuk morën as mbështetjen minimale.

Sot lagjja duket sikur asgjë nuk ka ndodhur. Shtëpitë janë rregulluar, ndërsa shtrati i lumit është rregulluar me investime komunale. Pyetja kryesore, se kur do të paguhen familjet, mbetet pa përgjigje: zyrtarët kompetentë të Ministrisë së Financave nuk iu përgjigjën pyetjes së RTK-së për afatin e kompensimit.