PDK bllokon hyrjen e Qeverisë: thirrje Kurtit të kthehet në Kuvend dhe t'i hapë rrugë konstituimit

Presioni i Partisë Demokratike të Kosovës ndaj bllokadës institucionale ka kaluar të martën para dyerve të ekzekutivit. Deputetët e PDK-së kanë vazhduar aksionin para objektit të Qeverisë, duke bllokuar hyrjen në shenjë proteste ndaj mosthirrjes së vazhdimit të seancës konstituive të Kuvendit.

Aksionit të martën i është bashkuar edhe Rinia Demokratike e Kosovës (RDK), krahu rinor i partisë.

Në qendër të protestës qëndron kërkesa drejtuar kryeministrit në detyrë, Albin Kurti, që të kthehet në Kuvend për t'i hapur rrugë rikthimit të rendit kushtetues. Në një mesazh të publikuar në Facebook, PDK-ja i është drejtuar Kurtit me fjalët: "Mos e mbaj peng shtetin, institucionet dhe interesin e qytetarëve për kalkulimet e tua individuale dhe partiake".

Paralelisht, deputetët e PDK-së po kërkojnë që kryesuesi i seancës konstituive, Avni Dehari, ta thërrasë vazhdimin e seancës dhe të mundësojë konstituimin e Kuvendit.

Aksioni i së martës vjen pas disa ditësh përpjekjesh të kësaj partie për të ushtruar presion mbi vazhdimin e seancës konstituive, e cila mbetet e pambyllur.