PDK nis betejën ligjore për Speciales: iniciativa pritet javën e ardhshme në Kuvend

Dënimi prej 81 vjetësh burgim në total për katër ish-udhëheqësit e Ushtrisë Çlirimtare të Kosovës ka nxjerrë në sipërfaqe një përpjekje politike me peshë kushtetuese: ndryshimin e Ligjit për Gjykatën Speciale. Nismën e synon ta ndërmarrë Partia Demokratike e Kosovës, e cila pritet ta dorëzojë iniciativën në Kuvendin e Kosovës gjatë javës së ardhshme.

Verdikti ndaj katërshes së UÇK-së u shpall duke u thirrur në emër të popullit të Kosovës. Sipas asaj që ka mësuar televizioni Dukagjini, iniciativa lidhet me ndryshime që mund të prekin shkallën e dytë të gjykimit, pra Apelin, në mënyrë që procedurat të mund të zhvillohen në Kosovë.

Se sa e realizueshme është një ndërhyrje e tillë, e shpjegojnë juristët që e njohin nga brenda punën e Dhomave të Specializuara. Skender Musa, avokat i akredituar në Gjykatën Speciale, paralajmëron se prekja vetëm e ligjit nuk mjafton. "Neni 65, paragrafi 1 dhe 2 e parashohin mënyrën e ndryshimit të ligjit, por nëse shkohet vetëm me ndryshimin e ligjit, konsideroj që është pak, për shkak se Dhomat e Specializuara në kuadër të vet kanë edhe Gjykatën Kushtetuese me kompetencë që t'i anulojë edhe ligjet edhe vendimet e Kosovës kur kanë të bëjnë me punën e Dhomave të Specializuara", ka deklaruar ai.

Musa bëri të ditur se, nëse synohet edhe ndryshimi i Kushtetutës, nevojiten po ashtu votat e komuniteteve joshumicë, përfshirë ato të Listës Serbe. "Me pas sukses ndryshimi pa u prekur pavarësia e Gjykatës dhe me u ndryshu amendamenti kushtetues duhet 2/3 e deputetëve shumicë, pra shqiptarë dhe 2/3 e deputetëve të komuniteteve, serbë dhe komunitete tjera, pra juridikisht ndryshimi është i mundshëm", tha ai.

Edhe avokati Ardian Bajraktari vlerëson se ka dispozita që nuk pajtohen me Kushtetutën. "Ekzistojnë një varg dispozitash të cilat janë në shpërputhje me kushtetutën, siç është çështja e dënimeve, pastaj kemi edhe mungesë të mekanizmit të mbikëqyrjes së kësaj gjykate, të gjitha këto mund të bëhen në një procedurë legjislative në kuvend nën supozimin që ka vullnet për ta bërë, pavarësisht që është relativisht vonë", theksoi ai.

Paralelisht me përgatitjet ligjore, PDK-ja po lëviz edhe në terrenin parlamentar. Një ditë më parë, kreu i partisë, Bedri Hamza, deklaroi se kanë siguruar 22 nënshkrime për mbajtjen e një seance të jashtëzakonshme.