PDK mbledh nënshkrime për seancë të jashtëzakonshme mbi ligjin për Specialen

Partia Demokratike e Kosovës ka nisur mbledhjen e nënshkrimeve të deputetëve për thirrjen e një seance të jashtëzakonshme të Kuvendit të Kosovës, me një qëllim të vetëm: miratimin në lexim të dytë të Projektligjit për Dhomat e Specializuara.

Kryetari i Grupit Parlamentar të PDK-së, Arian Tahiri, njoftoi përmes një postimi se ftesa u është dërguar të gjitha grupeve parlamentare dhe çdo deputeti veç e veç. "Sot, si Kryetar i Grupit Parlamentar të PDK-së, u kam përcjellë të gjitha grupeve parlamentare dhe, përkatësisht, secilit deputet ftesën për mbështetje dhe pjesëmarrje për seancën e jashtëzakonshme të Kuvendit", shkroi ai.

Rendi i ditës i propozuar nuk lë vend për tema të tjera. "Pika e vetme: shqyrtimi dhe miratimi në lexim të dytë i Projektligjit për Dhomat e Specializuara", theksoi Tahiri, duke e mbyllur postimin me thirrjen: "UÇK-ja duhet të na bashkojë!"

Deri tani, nisma e PDK-së ka gjetur mbështetjen e Aleancës dhe të Duda Baljes. Nuk dihet ende nëse janë siguruar nënshkrimet e nevojshme për thirrjen e seancës, as data kur ajo mund të mbahet.

Kërkesa vjen pas përpjekjeve të mëparshme të PDK-së për ta çuar ligjin për Specialen në votim përfundimtar në Kuvend.