PDK fton të gjithë deputetët në seancë të jashtëzakonshme për ligjin e Dhomave të Specializuara

Partia Demokratike e Kosovës (PDK) po kërkon mbështetjen e të gjithë Kuvendit për një seancë të jashtëzakonshme me vetëm një temë në rend dite: Dhomat e Specializuara.

Shefi i Grupit Parlamentar të PDK-së, Arian Tahiri, ka njoftuar se ftesa u është dërguar të gjithë deputetëve të Kuvendit të Kosovës, me thirrjen që të marrin pjesë dhe ta mbështesin seancën.

Sipas Tahirit, seanca do të ketë një pikë të vetme: shqyrtimin dhe miratimin në lexim të dytë të Projektligjit për Dhomat e Specializuara. Ai e shoqëroi njoftimin me një apel politik: "Pika e vetme: shqyrtimi dhe miratimi në lexim të dytë i Projektligjit për Dhomat e Specializuara. UÇK-ja duhet të na bashkojë!"

Data e seancës së jashtëzakonshme nuk është bërë ende e ditur, ashtu si edhe qëndrimi i grupeve të tjera parlamentare ndaj ftesës së PDK-së.