PDK dhe Aleanca ulen në sallën e Kuvendit: "Kurti, thirre seancën" – Aleanca vë 6 kushte për 7 votat

Ndenjëset e Kuvendit të Kosovës u mbushën pjesërisht, teksa deputetë të Partisë Demokratike të Kosovës (PDK) dhe dy deputetë të Aleancës u paraqitën në sallën e parlamentit për të kërkuar që të thirret vazhdimi i seancës konstituive dhe të funksionalizohen institucionet. Paraqitja erdhi një ditë pasi ishte kërkuar rifillimi i punimeve të asaj seance.

Të dy subjektet e drejtuan mesazhin nga salla, duke ngritur kritika ndaj Lëvizjes Vetëvendosje dhe duke i bërë thirrje kryetarit të saj, Albin Kurtit.

"Sot po kërkojmë diçka elementare, që të funksionojë shteti ynë. Andaj Kurti, thirre seancën dhe lëri institucionet të bëjnë punën e tyre. Kosova nuk është pronë e një lideri. Askush nuk ka të drejtë ta mbajë peng të ardhmen e Kosovës. Pasojat i ndjen pacienti që pret trajtim dhe mjeku që punon në kushte të vështira. I ndjen polici, zjarrfikësi, mësuesi, studenti, fermeri e biznesi. Ju qytetarë po e paguani çmimin e një shteti që nuk po lejohet të funksionalizohet", tha deputetja e PDK-së, Besa Kabashi-Ramaj.

Nga Aleanca, deputeti Besnik Tahiri vendosi një kusht të qartë për mbështetjen e tij: shtatë vota në këmbim të miratimit të gjashtë pikave që, sipas tij, nuk janë diskutuar deri më tani.

"Ne nuk kemi detyrë tjetër përveçse me ardhë në sallën që na e ka besuar qytetari me votën e tij. Qytetarë të Kosovës, sot i kam dy porosi: Konstituimi i parlamentit nuk lidhet me asgjë. Moskonstituimi i këtij institucioni është sikur mos me dashtë me e bo hapin e parë. Albin Kurti e ka ndal Kosovën që mos ta bëj hapin e parë. Si Aleancë, ne jemi pro konstituimit të Kuvendit, pro zgjedhjes së presidentit. Ne do t'i ofrojmë 7 votat tona nëse miratohen 6 pikat tona. Këto 6 pika asnjëherë nuk janë diskutuar", tha Tahiri.

Ngërçi për konstituimin e Kuvendit dhe formimin e institucioneve mbetet i pazgjidhur, ndërsa palët vazhdojnë të kërkojnë hapa nga njëra-tjetra.