PDK dhe Aleanca bojkotojnë seancën për Qeverinë: "Proces jokushtetues", nisin rrugën drejt Kushtetueses

Karriget e dy grupeve parlamentare pritet të mbeten bosh kur Kuvendi i Kosovës të mblidhet sot në ora 14:00 për të votuar Qeverinë e re. Partia Demokratike e Kosovës dhe Aleanca njoftuan se nuk marrin pjesë në seancën e jashtëzakonshme, duke e cilësuar të gjithë procesin jokushtetues.

Qëndrimin publik e bëri të ditur deputeti i Aleancës, Burim Ramadani, i cili tha se partia e tij nuk do të jetë pjesë e grumbullimit të orës 14:00 në sallën e Kuvendit. "Ne e konsiderojmë këtë proces jokushtetues dhe do t'i drejtohemi Gjykatës Kushtetuese", shkroi ai.

Ramadani kujtoi se Aleanca kishte vënë mbi tryezë, që nga 26 qershori, një marrëveshje me gjashtë pika, e menduar si rrugëdalje politike dhe si garanci stabiliteti. Sipas tij, ajo ofertë u refuzua dhe vendi po shtyhet drejt një krize të re. "Ne ofruam marrëveshje. Ata zgjodhën arrogancën. Ne ofruam zgjidhje. Ata zgjodhën krizën", deklaroi ai, duke shtuar: "Alianca zgjodhi Kosovën. Ata zgjodhën pushtetin e postet".

I njëjti vendim erdhi edhe nga radhët e PDK-së. Zyrtarë të kësaj partie bënë të ditur se deputetët nuk do të marrin pjesë në seancë, pas zhvillimeve rreth zgjedhjes së nënkryetarëve të Kuvendit dhe tërheqjes së përkohshme të kandidaturës së Vlora Çitakut. PDK-ja, e drejtuar nga Bedri Hamza, ka paralajmëruar gjithashtu se do t'i drejtohet Gjykatës Kushtetuese për zhvillimet e fundit.

Në rendin e ditës së seancës së jashtëzakonshme është zgjedhja e Qeverisë së Republikës së Kosovës. Bojkoti i dy partive e zhvendos përplasjen nga salla e Kuvendit drejt Gjykatës Kushtetuese, ku pritet të kërkohet vlerësimi i procesit.