"Kushtetuta nuk është pazar politik": PDK-ja braktis seancat e Kuvendit

Vazhdimi i seancës konstituive të Kuvendit të Kosovës nis sot pa Partinë Demokratike të Kosovës. Partia opozitare ka bërë të ditur se nuk do të marrë pjesë në seancat e legjislativit deri në një vendim të Gjykatës Kushtetuese lidhur me procesin e konstituimit.

Vendimin e ka konfirmuar sekretarja e përgjithshme e PDK-së, Vlora Çitaku, e cila ka theksuar se partia nuk po heq dorë nga e drejta e saj. "Shefi i Grupit Parlamentar Arian Tahiri e dorëzon letrën në Kuvend që derisa ta sqarojë Gjykata, nuk marrim pjesë. Nuk heqim dorë nga e drejta, po e presim vendimin e Gjykatës", ka deklaruar ajo, duke shtuar se partia po pret afatin e fundit për t'iu drejtuar Gjykatës Kushtetuese.

Seanca ishte paraparë të nisë në orën 10:00, me pikën e katërt të rendit të ditës: zgjedhjen e nënkryetarëve të Kuvendit. Kryetari i Lidhjes Demokratike të Kosovës, Lumir Abdixhiku, ka hyrë i pari në objektin e Kuvendit, ku deputetët pritet të votojnë për plotësimin e këtyre pozitave.

Në një komunikatë, PDK-ja ka akuzuar Lëvizjen Vetëvendosje për shkelje të afateve kushtetuese dhe për bllokim të përsëritur të procesit, duke thënë se kushtet e reja politike të vendosura nga LVV-ja e kanë pamundësuar përfundimin e konstituimit. Sipas partisë, Kuvendi është dashur të konstituohet brenda afatit 30-ditor, më së largu më 7 gusht, ndërsa as afati i dytë, 6 shtatori, nuk është respektuar.

Pavarësisht kësaj, thekson PDK-ja, ajo mori pjesë në seancat e 9 dhe 11 shtatorit me qëllim që procesi të përmbyllej. Sipas saj, votoi kandidatin e Vetëvendosjes për nënkryetar, ndërsa LVV-ja nuk e votoi kandidaten e PDK-së. Partia opozitare kundërshton gjithashtu kushtëzimin e votimit të nënkryetarëve me votimin për Presidentin e Republikës: "Kushtetuta nuk është pazar politik", thuhet në komunikatë.

Ekspertët e PDK-së, sipas njoftimit, po përgatitin rastin që do t'i dërgohet Gjykatës Kushtetuese për procesin në tërësi. "Deri në vendimin e Gjykatës Kushtetuese, qëndrimi i Partisë Demokratike të Kosovës mbetet i qartë: PDK nuk do të marrë pjesë në seancat e Kuvendit", theksohet në komunikatën e partisë.