Hagë: prokuroria shqyrton pronat e Thaçit, Veselit, Krasniqit dhe Selimit

Në Hagë, vëmendja e zyrtarëve të Dhomave të Specializuara të Kosovës ka kaluar nga salla e gjyqit te llogaritë dhe pronat e katër të akuzuarve. Objekt i interesimit është pasuria e Hashim Thaçit, Kadri Veselit, Jakup Krasniqit dhe Rexhep Selimit, të akuzuar në rastin e ish-krerëve të Ushtrisë Çlirimtare të Kosovës.

Sipas gazetares së Klan Kosovës, Rina Mujku, që raporton nga Haga, Prokuroria e Dhomave të Specializuara po shqyrton se cilat prona janë në pronësi apo në emër të Thaçit, Veselit, Krasniqit dhe Selimit. Ajo sqaroi se, bazuar në praktikat e deritanishme të kësaj gjykate, një procedurë e tillë mund të lidhet me mundësinë e kompensimit të viktimave pas përfundimit të procesit gjyqësor.

"Një lajm që sapo e kemi marrë, në fakt është hera e dytë që ne e konfirmojmë ekskluzivisht, meqenëse jemi këtu dhe jemi shumë afër burimeve sesa atëherë pra kur kemi qenë në Kosovë, dhe kemi parë natyrisht e kemi biseduar edhe me zyrtarë të gjykatës tashmë, është hera e dytë që ne e kuptojmë se zyrtarë të Dhomave të Specializuara janë duke u interesuar për pronat e katërshes së akuzuar në këtë rast. Kemi raportuar ekskluzivisht qysh në muajin prill të këtij viti, pasi ishte mbyllur ky rast, se Prokuroria po shikon edhe një herë se cilat prona janë në pronësi, pra në emër të të akuzuarve në këtë rast Thaçit, Veselit, Krasniqit dhe Selimit", deklaroi Mujku.

Sipas saj, kjo nuk është një praktikë e panjohur për gjykatën në Hagë. E njëjta procedurë, thotë ajo, është zbatuar edhe në rastet e Salih Mustafës dhe Pjetër Shalës, të gjykuar më herët nga Dhomat e Specializuara.

"Është një procedurë e cila, pa dashur që të paragjykojmë për këtë proces meqenëse është një rast shumë i ndjeshëm, por duke folur vetëm me fakte dhe në praktikat e Gjykatës Speciale, sikurse ka ndodhur deri tash në rastin e Salih Mustafës dhe të Pjetër Shalës, kryhet vetëm për të shikuar se sa të ardhura dhe sa prona kanë katërshja e UÇK-së në rast se do të duhej që pas aktgjykimit të merret një vendim tjetër edhe për zhdëmtimin e viktimave", tha ajo.

Elementi më i rëndësishëm procedural ka të bëjë me rrugën që do të marrë çështja e zhdëmtimit. Sipas Mujkut, është vendosur që 156 viktimat në këtë rast të mos detyrohen të ndjekin padi civile individuale në gjykatat e rregullta të Kosovës, por që gjithçka të trajtohet brenda strukturës së Dhomave të Specializuara.

"Duke qenë se ky proces është vendosur qysh në nëntor të vitit 2025 që të shikohet dhe të merret një vendim për të, jo me shpalljen e aktgjykimit, por pas përfundimit të procesit gjë e cila ka ndodhur edhe në rastin e Mustafës dhe Shalës dhe po ashtu nuk është lënë që të shkohet dhe të procedohet tutje në gjykatat e rregullta të Kosovës, pra me padi civile të secilës prej 156 viktimave individualisht, por ky proces të kryhet po ashtu në Dhomat e Specializuara të Kosovës", tha ajo.