Pas dy rasteve tragjike, Gjilani kërkon polici në shkolla dhe kontrolle për armë

Më shumë policë në oborret e shkollave dhe më shumë kontrolle për armët që mbahen pa leje: kjo është kërkesa që kryetari i Gjilanit, Alban Hyseni, ka shtruar zyrtarisht pas dy rasteve tragjike që kanë goditur komunën.

Kërkesat u paraqitën në një mbledhje urgjente të Këshillit Komunal për Siguri në Bashkësi, ku u diskutua gjendja e sigurisë në qytet. Në tryezë ishte edhe zëvendësministri i Punëve të Brendshme, Enver Dugolli. Drejtori rajonal i policisë dhe komandanti i stacionit policor dhanë informacione për rastet e fundit, natyra e të cilave nuk është bërë e ditur në mbledhje.

"Gjatë mbledhjes kërkova zyrtarisht rritjen e kontrolleve policore për armëmbajtje pa leje dhe shtimin e prezencës së policisë në shkolla për të garantuar sigurinë e fëmijëve tanë", shkroi Hyseni në një postim në Facebook.

Sipas tij, institucionet komunale kanë ofruar bashkëpunim të plotë me organet e rendit, ndërsa përfaqësuesit institucionalë që morën pjesë në takim janë zotuar për angazhim më të madh në parandalimin e rasteve të tilla.

"Mbrojtja e jetës së qytetarëve tanë mbetet prioriteti ynë kryesor dhe do të punojmë me vendosmëri për të garantuar qetësinë dhe rendin publik në çdo pjesë të Gjilanit", deklaroi Hyseni.