Pas dy ditëve përleshjesh, Meloni dërgon 500 ushtarë në rrugët e Milanos

Pesëqind ushtarë do të patrullojnë në Milano deri në fund të vitit. Kryeministrja italiane, Giorgia Meloni, udhëheqëse e së djathtës ekstreme, njoftoi të martën, më 20 tetor, se trupat do t'i dalin në ndihmë policisë pas përleshjeve që tronditën metropolin e Lombardisë gjatë fundjavës.

Njoftimi erdhi përmes një videoje të publikuar në rrjetin social X. Aty Meloni bëri të ditur se Këshilli i Ministrave miratoi edhe një paketë masash: lehtësimin e ndalimit të të miturve, gjoba për prindërit e tyre kur shkaktohen dëme dhe krijimin e veprës penale të "pjesëmarrjes së dhunshme në një protestë". "Të protestosh është e drejtë, por të shkatërrosh qytetet tona nuk është", tha ajo.

Përleshjet shpërthyen të shtunën dhe të dielën. Gjatë dy ditëve, qindra protestues u shoqëruan nga policia, ndërsa dhjetëra efektivë mbetën të plagosur. Në kryeqytetin italian të modës u plaçkitën disa dyqane. Disa marka i mbajtën dyert e mbyllura gjatë gjithë javës, të tjera hoqën vitrinat dhe forcuan sigurinë.

Protestat nuk kufizohen në Milano. Nxënës të shkollave të mesme, studentë, fermerë dhe shoferë kamionësh janë në rrugë në gjithë Italinë, kryesisht kundër rritjes së kostos së jetesës.

Qëndrimi i qeverisë ishte i qartë që në fundjavë. Të shtunën, Meloni i cilësoi autorët e dhunës si "huliganë që shfrytëzojnë protestat për të mbjellë kaos, për të sulmuar ata që garantojnë sigurinë dhe për të mbajtur peng qytete të tëra".

Përballja ka edhe një prapavijë politike. Meloni pret zgjedhjet vitin e ardhshëm, ku ekonomia, siguria dhe emigracioni pritet të jenë temat kryesore. Ndërkohë, protesta të reja janë paralajmëruar për të shtunën.