ReklamëHapësirë reklame
ReklamëHapësirë reklame
Reklamë
Gjermania thotë se UÇK-ja dhe synimi i saj për pavarësi nuk ishin në gjyq dhe se aktgjykimi nuk i shfajëson aktorët jugosllavë, ndërsa Franca rikonfirmon mbështetjen për pavarësinë e Kosovës. Ekipet mbrojtëse të katër ish-eprorëve të UÇK-së kanë paralajmëruar ankesë.
Aktgjykimi dënues i Dhomave të Specializuara të Kosovës në Hagë ndaj katër ish-eprorëve të Ushtrisë Çlirimtare të Kosovës ka nxjerrë në sipërfaqe dy reagime diplomatike me të njëjtin mesazh bazë: procesi nuk e vë në bankën e të akuzuarve luftën e Kosovës, dhe ai nuk është ende i mbyllur.
Ambasadori i Gjermanisë në Kosovë, Reiner Rudolph, deklaroi se as Ushtria Çlirimtare e Kosovës dhe as synimi i saj për një shtet të pavarur nuk ishin objekt i gjykimit ndaj Hashim Thaçit, Kadri Veselit, Rexhep Selimit dhe Jakup Krasniqit. "Siç theksoi kryetari i trupit gjykues gjatë shpalljes së aktgjykimit, vetë Ushtria Çlirimtare e Kosovës nuk ishte në gjyq dhe as synimi i saj për një Kosovë të pavarur", thuhet në deklaratën e tij.
Rudolph theksoi se vendimi nuk i liron nga përgjegjësia aktorët jugosllavë për konfliktin e armatosur dhe për shkeljet masive të të drejtave të njeriut ndaj popullit të Kosovës. "Aktgjykimi në asnjë mënyrë nuk i shfajëson aktorët jugosllavë nga përgjegjësia për konfliktin e armatosur dhe shkeljet në shkallë të gjerë të të drejtave të njeriut që iu shkaktuan popullit të Kosovës në fund të viteve 1990, të cilat tashmë janë hetuar nga gjykatat ndërkombëtare dhe që nxitën ndërhyrjen e bashkësisë ndërkombëtare", citohet ambasadori.
Sipas tij, Berlini e ka mbështetur punën e Dhomave të Specializuara që nga fillimi, me bindjen se kjo gjykatë jep kontribut të rëndësishëm në trajtimin e krimeve të luftës dhe të krimeve kundër njerëzimit, si dhe ndikon në forcimin e sundimit të ligjit dhe në afrimin e Kosovës me Bashkimin Evropian. "Duke i themeluar Dhomat e Specializuara dhe duke bashkëpunuar me Tribunalin Penal Ndërkombëtar për ish-Jugosllavinë, Kosova ka dëshmuar se po e përmbush përgjegjësinë e saj, përfshirë trajtimin e krimeve të luftës, si shtet i pavarur dhe sovran", deklaroi ai, duke u bërë thirrje të gjitha palëve ta respektojnë aktgjykimin dhe dinjitetin e viktimave.
Nga Parisi, Ministria franceze për Evropën dhe Punët e Jashtme bëri të ditur përmes një deklarate të publikuar në uebfaqen e saj se e ka marrë në dijeni vendimin në rastin "Thaçi dhe të tjerët", duke rikujtuar se palët kanë të drejtë ankese. "Ky vendim, i cili mund të apelohet, shënon përfundimin e proceseve të shkallës së parë para Dhomave të Specializuara, me përjashtim të rasteve që lidhen me pengimin e administrimit të drejtësisë", thuhet në deklaratë.
Parisi zyrtar ritheksoi po ashtu qëndrimin e tij ndaj gjykatës dhe ndaj statusit të Kosovës: "Franca përsërit mbështetjen e saj për Dhomat e Specializuara të Kosovës dhe rikujton angazhimin në luftën kundër pandëshkueshmërisë. Ajo gjithashtu rikonfirmon mbështetjen e palëkundur për pavarësinë e Kosovës dhe institucionet e saj".
Trupi gjykues i Dhomave të Specializuara shpalli më 16 shtator aktgjykimin me të cilin katër ish-eprorët e UÇK-së u gjetën penalisht përgjegjës për krime lufte: ndalimin e paligjshëm ose arbitrar, trajtimin mizor, torturën dhe vrasjen e paligjshme. Ish-presidenti Hashim Thaçi u dënua me 25 vjet burgim për katër pika të aktakuzës, po aq sa edhe ish-kryeparlamentari Jakup Krasniqi. Ish-kryeparlamentari Kadri Veseli mori 18 vjet, kurse ish-deputeti Rexhep Selimi 13 vjet. Në të njëjtin aktgjykim, trupi gjykues i hodhi poshtë akuzat e Zyrës së Prokurorit të Specializuar për krime kundër njerëzimit. Të katërt gjenden në paraburgim në Hagë që nga nëntori i vitit 2020.
Aktgjykimi nuk është i formës së prerë. Ekipet mbrojtëse të ish-eprorëve kanë paralajmëruar se do ta dërgojnë çështjen në Apel, ndërsa edhe Zyra e Prokurorit të Specializuar ka të drejtë ta kundërshtojë vendimin dhe të kërkojë ashpërsim të dënimeve. ZPS-ja e mirëpriti vendimin dënues dhe njoftoi se do ta shqyrtojë të gjithë aktgjykimin, përfshirë rrëzimin e pikave që kishin të bënin me krime kundër njerëzimit.
Procedura e ankimit është e përcaktuar me Rregulloren e Procedurës dhe Provave. Pala që apelon vendimin, dënimin ose të dyja duhet të dorëzojë njoftimin për apel, ku parashtrohen arsyet e ankesës, brenda 30 ditësh nga shpallja e aktgjykimit. Më pas, kryegjykatësi i panelit treanëtarësh të Gjykatës së Apelit mund ta caktojë njërin nga gjykatësit si gjykatës raportues për procedurën paraapeluese, i cili merr masat procedurale, nxjerr vendime, urdhra dhe udhëzime për ta përgatitur çështjen dhe e informon rregullisht panelin, sidomos nëse ka kontestime procedurale.
Brenda 21 ditësh nga njoftimi për apel, kryegjykatësi ose gjykatësi raportues thërret një konferencë ku ngrihen çështjet lidhur me apelin. Pastaj palët ankuese dorëzojnë dosjen e apelit me të gjitha argumentet dhe burimet ligjore mbështetëse: brenda 60 ditësh, ose brenda 30 ditësh nëse ankesa ka të bëjë vetëm me dënimin e shqiptuar. Vjen më pas dosja e përgjigjes, me afate prej 30 ditësh për argumentet dhe burimet ligjore dhe 15 ditësh kur bëhet fjalë vetëm për dënimin, dhe në fund dosja e kundërpërgjigjes, me afate edhe më të shkurtra, 15 ditë, përkatësisht 10 ditë nëse çështja kufizohet te dënimi. Vetëm pas kalimit të këtyre afateve Gjykata e Apelit e cakton datën e një seance, "nëse është e nevojshme", siç parashihet në rregullore.
Pas vitesh pritjeje, mosmarrëveshja për qindra miliona euro të paguara nga buxhetet komunale arriti në fazën e parë dëgjimore. Drejtori ekzekutiv i AKK-së, Sazan Ibrahimi, thotë se niveli qendror as që u paraqit.
