Pas aktgjykimit të Hagës: LDK-ja mbron UÇK-në, BE-ja kërkon përmbajtje në Kosovë

"Asnjë aktgjykim, as ky i sotmi, nuk mund ta zhbëjë të vërtetën historike të luftës në Kosovë." Me këtë fjali, kryetari i Lidhjes Demokratike të Kosovës, Lumir Abdixhiku, hapi reagimin e tij pas aktgjykimit të Gjykatës Speciale ndaj Hashim Thaçit, Kadri Veselit, Jakup Krasniqit dhe Rexhep Selimit, të shpallur më 16 shtator në Dhomat e Specializuara të Kosovës në Hagë.

Abdixhiku vuri theksin te roli i Ushtrisë Çlirimtare të Kosovës në historinë e vendit. "Djemtë e vajzat e Ushtrisë Çlirimtare të Kosovës mbrojtën pragun e shtëpisë. UÇK-ja mbetet pjesa më krenare e historisë moderne të popullit tonë; dje, sot e përjetësisht", shkroi ai.

Në deklaratën e tij, kreu i LDK-së u ndal te krimet e kryera gjatë luftës, duke thënë se "Regjimi i Serbisë ushtroi gjenocid e krime kundër njerëzimit; zhvilloi një fushatë të egër terrori dhe spastrimi etnik në Kosovë; masakroi civilë të pafajshëm, vrau fëmijë, gra e të moshuar, ushtroi dhunë, dëboi me forcë popullsinë dhe dogji e shkatërroi fshatra e qytete të tëra".

Pjesa e fundit e reagimit të tij ishte një thirrje politike. "U bëjmë thirrje të gjitha forcave politike t'i lëmë mënjanë ndasitë dhe të qëndrojmë bashkë për ta përballuar këtë periudhë të vështirë për Kosovën. Liria jonë ka kushtuar shumë. Shteti ynë është përgjegjësi e të gjithëve. Ta ruajmë Kosovën, unitetin qytetar dhe miqësitë që i qëndruan pranë në rrugën drejt lirisë e pavarësisë", përfundoi Abdixhiku.

Në të njëjtën linjë doli edhe deputeti i LDK-së, Avdullah Hoti, i cili tha se një aktgjykim nuk mund ta zbehë historinë e UÇK-së. "Kriminal ishte regjimi i Millosheviqit dhe aparati shtetëror serb që ushtroi gjenocid, dhunë e represion mbi Kosovën, jo e drejta e popullit tonë për t'u çliruar", deklaroi ai.

Ndryshe nga aktorët politikë vendorë, Bashkimi Evropian zgjodhi gjuhën e kujdesit. Brukseli u bëri thirrje të gjitha palëve dhe aktorëve në Kosovë dhe në rajon të tregojnë përmbajtje pas aktgjykimit ndaj Thaçit, Veselit, Selimit dhe Krasniqit. Në një deklaratë për Radion Evropa e Lirë, zëdhënësi i BE-së, Guillaume Mercier, tha se Dhomat e Specializuara dhe Zyra e Prokurorit të Specializuar duhet të lejohen ta ushtrojnë mandatin e tyre pa ndërhyrje.

"Drejtësia duhet të lejohet të ndjekë rrjedhën e saj, gjë që është veçanërisht e rëndësishme për viktimat. Autoritetet kanë përgjegjësinë të garantojnë sigurinë e të gjitha komuniteteve dhe banorëve në mbarë Kosovën", tha Mercier.

BE-ja tha se "merr shënim" aktgjykimin e shkallës së parë dhe vlerësoi se Dhomat e Specializuara po administrojnë drejtësi përmes procedurave "të drejta, të paanshme dhe të pavarura", të bazuara në parimin e përgjegjësisë penale individuale. Mercier rikujtoi gjithashtu se personat e dënuar kanë të drejtë ta apelojnë aktgjykimin para një paneli të veçantë të gjyqtarëve të Apelit.