Papa Leoni XIV ka kancer në mushkëri: Vatikani konfirmon diagnozën pas operacionit 7-orësh

Papa Leoni XIV është diagnostikuar me kancer në mushkëri. Në një buletin mjekësor, Vatikani bëri të ditur se gjatë operacionit të së martës kirurgët i hoqën Papës lobin e poshtëm të mushkërisë së djathtë dhe se diagnoza është adenokarcinomë pulmonare, një formë e zakonshme e kancerit të mushkërive.

Sipas Vatikanit, dyshimi për këtë diagnozë kishte lindur që nga analizat e kryera para ndërhyrjes dhe u konfirmua gjatë vetë operacionit. Nyja, e cila ishte shkaku i ndërhyrjes, rezultoi kanceroze.

Lajmi vjen pas njoftimit të parë, shumë të shkurtër, të Selisë së Shenjtë, sipas të cilit "procedura u përfundua me sukses, brenda kohës së pritur dhe sipas planit". Vatikani shtoi se Papa "u zgjua normalisht" pas ndërhyrjes.

Operacioni u krye në spitalin Gemelli të Romës, institucioni ku prej dekadash trajtohen papët, dhe zgjati rreth shtatë orë. Sipas deklaratës së Vatikanit, rikuperimi i Papës 71-vjeçar pritet të zgjasë rreth një javë.

Onkologët e vlerësojnë prognozën si të shkëlqyer, pikërisht sepse nyja kanceroze u zbulua në një fazë shumë të hershme. Megjithatë, pyetja kryesore mbetet ende e hapur: një burim i Vatikanit, i cituar nga agjencia AFP, tha se po kryhen analiza të tjera për të përcaktuar nëse kanceri është përhapur më tej. Rezultatet e tyre nuk janë bërë ende publike.

Vetë Leoni ishte ai që e bëri publik problemin shëndetësor. Të dielën, gjatë një shërbese lutjeje para mijëra besimtarëve në Sheshin e Shën Pjetrit, ai u tregoi atyre për operacionin që e priste. Ky hap shënon një kthesë të dukshme në krahasim me paraardhësit e tij: në të kaluarën, Vatikani është akuzuar shpesh për deklarata konfuze ose jashtëzakonisht të paqarta mbi shëndetin e papëve, kur nuk ka heshtur fare.

Të gjitha angazhimet e Papës janë anuluar deri më 20 tetor. Udhëtimi i planifikuar në Amerikën e Jugut në nëntor, megjithatë, ka gjasa të mbetet në fuqi.