Pamjet e YouTuberit britanik nga kampi në Vrellë nxisin hetimin e IPK-së

Inspektorati Policor i Kosovës (IPK) ka nisur një hetim preliminar për hyrjen e pretenduar pa leje të një shtetasi britanik në kampin e Njësive Speciale të Policisë së Kosovës në Vrellë të Fushë-Kosovës. Rasti doli në dritë pasi vetë ai, një YouTuber britanik, publikoi pamjet e xhiruara brenda objektit.

Hetimi u iniciua nga Departamenti i Hetimeve i IPK-së, pasi shqyrtoi materialin e publikuar në media. Sipas IPK-së, synimi është sqarimi i rrethanave të rastit, me fokus të veçantë te përgjegjësitë që lidhen me sigurimin e kampit. "IPK-ja do të ndërmarrë veprimet e nevojshme në përputhje me mandatin dhe kompetencat ligjore", thuhet në njoftimin e institucionit.

Në videon e postuar në YouTube, britaniku shihet duke filmuar me telefon hapësira të ndryshme të kampit, përfshirë pajisje dhe mjete të konfiskuara nga Policia e Kosovës. Pretendohet se ai hyri pa leje dhe pa u penguar nga asnjë zyrtar. Në fund të videos, ai shfaq edhe shtegun përmes të cilit pretendohet se ka hyrë në objekt.

Rasti, i bërë publik disa ditë më parë, ka ngritur pikëpyetje serioze për masat e sigurisë dhe kontrollin e qasjes në objektet që shfrytëzohen nga njësitë speciale të policisë.