Pamjet e kamerave të policisë: momenti kur Luigi Mangione u identifikua në një McDonald's

"Është 100% ai." Me këto fjalë, një polic në Altoona të Pensilvanisë u shpreh me entuziazëm sapo doli jashtë restorantit McDonald's, larg veshit të të riut që sapo kishin urdhëruar të ulte maskën nga fytyra. "Të thashë, o burrë", iu përgjigj një koleg jashtë kamerës.

Ky është një nga momentet e regjistruara në pamjet e kamerave trupore të policisë, të publikuara të premten, që tregojnë si u gjet dhe u arrestua Luigi Mangione, i lidhur me vrasjen me armë zjarri të Brian Thompsonit, drejtorit ekzekutiv të kompanisë së sigurimeve shëndetësore UnitedHealthcare, në Manhatan.

Zyra e Prokurorit të Distriktit të Manhatanit publikoi më shumë se pesë orë video të lidhura me arrestimin, i cili erdhi pas një telefonate në numrin e emergjencës 911. Regjistrimet u zhbllokuan nga një gjykatës i Manhatanit, pasi televizioni CNN kishte kërkuar zyrtarisht publikimin e tyre.

Arrestimi ndodhi më 9 dhjetor 2024, pesë ditë pasi Thompson, një drejtues 50-vjeçar nga Minesota, u qëllua për vdekje teksa ecte drejt një hoteli në zonën qendrore të Manhatanit, ku kompania e tij mbante konferencën vjetore me investitorët. Restoranti ku u gjet Mangione ndodhet në Pensilvaninë qendrore, gati 300 milje larg Manhatanit.

Pamjet nisin me mbërritjen e policëve në restorant. Atje ata gjejnë Mangionen, pasardhës i një familjeje të pasur nga Merilendi dhe i shkolluar në një nga universitetet elitare amerikane, ulur në një tavolinë, me kapelë skiatori, maskë kirurgjikale dhe pallto dimri. Policët i thonë se po reagojnë ndaj një sinjalizimi për një person të dyshimtë dhe i kërkojnë emrin dhe dokumentin e identifikimit.

"Je pak nervoz tani. Pse je nervoz?", e pyet një prej tyre. Policët e urdhërojnë të vendosë duart mbi kokë dhe e pyesin nëse kishte qenë së fundmi në Nju Jork. Më pas e përballin me një patentë shoferi të rreme të Nju Xhersit që ai u kishte dhënë, me emrin Mark Rosario.

"Tani je nën hetim zyrtar policor", e paralajmëron një polic. "Nëse na jep sërish emër të rremë, do të arrestohesh për identitet të rremë."

Kur Mangione më në fund pranon identitetin e vërtetë, policët e pyesin pse kishte gënjyer. "Natyrisht, nuk duhej ta kisha bërë", përgjigjet ai, ndërsa i kërkohet të shkruajë emrin e tij të vërtetë dhe ta gërmëzojë me zë.

Në video të tjera, policët e kontrollojnë trupërisht, i lexojnë të drejtat, i vendosin prangat dhe e dërgojnë në komisariat. Gjatë kontrollit të sendeve personale, një policeshë nxjerr një fishek arme dhe buzëqesh gjerësisht, një moment që duket se u konfirmoi agjentëve se kishin gjetur të dyshuarin që kërkonin.

Në çantën e shpinës së Mangiones, një polic gjeti një pistoletë 9 mm, për të cilën autoritetet do të konfirmonin më vonë se ishte arma e përdorur në vrasje, si dhe një silenciator dhe një karikator tjetër. U sekuestruan gjithashtu shënime të shkruara me dorë dhe një ditar, për të cilin prokurorët do të deklaronin më vonë se zbulonte synimin e tij për të vrarë (në origjinal "wack", fjalë zhargoni) një drejtues të sigurimeve shëndetësore.