"Pamëshirshëm": 54-vjeçari pretendon se u rrah nga tre policë në protestën e Prishtinës

Tre policë, një trotuar përballë një kafeje në qosh dhe gjak. Kështu e përshkruan Fatmir Dervishi, 54 vjeç, momentin kur, sipas tij, u rrah nga policia gjatë protestës së djeshme në Prishtinë.

Dervishi, i cili ishte pjesë e protestës, foli në një lidhje direkte për T7, në emisionin Kosova Live. Aty ai rrëfeu edhe për gjendjen e tij shëndetësore pas ngjarjes.

"Jam sulmuar në trotuarin që është përballë kafesë në qosh, ku një djalë i ri u rrëzua në atë pjesën që është me gjelbërim mes sheshit dhe banesave, dhe u sulmova nga tre policë të cilët më kanë goditur, gjakderdhja ishte problemi kryesor. Një forcë e përdorur jashtëzakonisht e pamëshirshme, e padrejtë", tha ai.

Në rrëfimin e tij, Dervishi përmend edhe një djalë të ri që u rrëzua në hapësirën me gjelbërim mes sheshit dhe banesave, pranë vendit ku thotë se u sulmua vetë. Ende nuk dihet nëse policia ka reaguar ndaj këtyre pretendimeve.