Pagesa të menjëhershme 24 orë në ditë: Kosova hyn në sistemin TIPS Clone

Kosova do të jetë pjesë e një sistemi të ri pagesash të menjëhershme për Ballkanin Perëndimor, i ndërtuar sipas modelit evropian TIPS, i cili lejon kryerjen e pagesave 24 orë në ditë, në çdo ditë të vitit.

Përfundimin e projektit, të quajtur TIPS Clone, e njoftoi ministri italian i Punëve të Jashtme, Antonio Tajani, gjatë Samitit të Procesit të Berlinit në Budva të Malit të Zi, ku mori pjesë në përfaqësim të kryeministres Giorgia Meloni. Lajmi u bë publik përmes një komunikate të Ministrisë së Punëve të Jashtme të Italisë. Nisma është zhvilluar me propozimin e Bankës së Italisë.

Krahas Kosovës, në sistem përfshihen Shqipëria, Bosnja e Hercegovina, Maqedonia e Veriut dhe Mali i Zi.

Sipas komunikatës italiane, projekti synon të lehtësojë shkëmbimet ekonomike, të ulë kostot e transaksioneve dhe t'i hapë rrugë integrimit gradual të vendeve të rajonit në infrastrukturën financiare evropiane.

Tajani e cilësoi nismën si rezultat konkret të angazhimit të Italisë ndaj Ballkanit Perëndimor dhe të mbështetjes së saj për perspektivën evropiane të rajonit. Ai ritheksoi se integrimi evropian i Ballkanit Perëndimor është një investim strategjik për stabilitetin, sigurinë dhe prosperitetin, jo vetëm të rajonit, por të gjithë kontinentit. Ministria e tij e paraqiti këtë mbështetje si përparësi strategjike të politikës së jashtme italiane, në të cilën përfshihen institucione të ndryshme kombëtare.

Inaugurimi zyrtar i sistemit është paraparë më 23 nëntor në Romë, në praninë e guvernatorëve të bankave qendrore të pesë vendeve pjesëmarrëse.