Pacolli thyen heshtjen pas paraburgimit të biznesmenit V.L.: do të kërkojmë përgjegjësi

"Çdokush që ka shpërdoruar besimin e dhënë, duhet të mbajë përgjegjësi përpara ligjit." Me këtë mesazh ka dalë publikisht Behgjet Pacolli, për herë të parë pas arrestimit të biznesmenit të njohur kosovar V.L., të cilit Gjykata Themelore në Prishtinë i ka caktuar një muaj paraburgim.

Pacolli nuk e përmend askënd me emër, por shkrimi i tij duket se është për ish-drejtorin e grupit "Mabetex". Në të, ai shkruan se askush nuk ka të drejtë "të përvetësojë rezultatet e punës së të tjerëve".

Të njëjtin ton e mban edhe pjesa më e gjatë e reagimit, ku Pacolli paralajmëron veprime ligjore: "Askush nuk ka të drejtë ta shkelë besimin e dhënë, të përvetësojë rezultatet e punës së të tjerëve apo të disponojë në mënyrë të paligjshme pasurinë që nuk i përket. Për çdo shkelje të konstatuar, për çdo hajni dhe abuzim nuk do të ndalemi dhe do të kërkojmë përgjegjësi të plotë ligjore, si dhe kompensimin e të gjitha dëmeve të shkaktuara, përmes institucioneve kompetente dhe mekanizmave ligjorë përkatës, qofshin ato në vendet tona apo gjetiu".

Akuzat konkrete ndaj V.L. nuk janë bërë ende publike. Masa e paraburgimit nuk është vendim për fajësinë, dhe i dyshuari konsiderohet i pafajshëm deri në një vendim të formës së prerë të gjykatës.