Pacientë të detyruar të sigurojnë vetë barnat: Bordi i SHSKUK-së kërkon llogari

Pacientë që janë detyruar t’i sigurojnë vetë barnat dhe materialet medicinale, mungesa të theksuara të penjve kirurgjikalë dhe raste me stok zero: këto janë disa nga gjetjet e Njësisë së Auditimit të Brendshëm në Shërbimin Spitalor Klinik dhe Universitar të Kosovës (SHSKUK). Ato e kanë shtyrë Bordin Drejtues të kërkojë masa konkrete dhe të hapë rrugën për shqyrtime disiplinore.

Në mbledhjen e 30 shtatorit, Bordi shqyrtoi Raportin Final të auditimit për "Sistemin e menaxhimit të barnave dhe materialeve medicinale në SHSKUK/QKUK", i cili mbulon periudhën nga viti 2025 deri në korrik 2026. Raporti evidenton mangësi në të gjitha hallkat e zinxhirit: planifikimin, furnizimin, menaxhimin dhe monitorimin e barnave dhe materialeve medicinale.

Sipas SHSKUK-së, ndër problemet e konstatuara janë "planifikimi pa mbulim të qartë financiar, mospërputhjet ndërmjet planifikimit dhe hyrjeve, inicimi i kontratave pa u bazuar në gjendjen reale të stokut, si dhe mangësitë në gjurmueshmërinë dhe mbikëqyrjen e procesit të furnizimit."

Pasojat nuk kanë mbetur vetëm në letër. "Auditimi ka evidentuar gjithashtu mungesa që kanë ndikuar drejtpërdrejt në ofrimin e shërbimeve klinike, përfshirë mungesa të theksuara të penjve kirurgjikalë dhe barnave të caktuara, si dhe raste kur pacientët janë detyruar t’i sigurojnë vetë barnat apo materialet medicinale", thuhet në njoftimin e SHSKUK-së.

Për këto gjetje, Bordi ka kërkuar që rastet ku ekziston dyshimi për shkelje të detyrave të punës t’i përcillen organit kompetent disiplinor. Institucioni ka theksuar se ky hap nuk nënkupton fajësi: "Referimi për shqyrtim disiplinor nuk përbën konstatim paraprak të fajësisë apo përgjegjësisë individuale", thuhet në njoftim. Përgjegjësia eventuale, sipas SHSKUK-së, do të përcaktohet pasi të shqyrtohen provat, dokumentacioni dhe deklarimet e personave përkatës. Asnjë person nuk është identifikuar publikisht si përgjegjës.

Bordi ka renditur edhe rastet që duhet të trajtohen me përparësi: "rastet e stokut zero dhe vonesat në inicimin e furnizimit, mungesat e zgjatura të penjve kirurgjikalë, dokumentacioni i pagjetur lidhur me kërkesën e datës 28.04.2025, dhe devijimet në planifikimin dhe përcjelljen e barnave për terapi të vazhdueshme".

Afatet janë të shkurtra. Drejtori i Përgjithshëm i SHSKUK-së është obliguar që brenda 15 ditëve t’i raportojë Bordit si për rastet e referuara, ashtu edhe për masat e marra për sigurimin e furnizimit me barna dhe materiale medicinale. Menaxhmenti, nga ana e tij, duhet të paraqesë një plan për zbatimin e nëntë rekomandimeve të auditimit, me masa konkrete për planifikimin, menaxhimin e stokut, furnizimin, gjurmueshmërinë dhe monitorimin.

Bordi ka kërkuar që gjetjet e auditimit të shoqërohen me "veprime konkrete institucionale, afate dhe përgjegjësi të qarta" dhe ka paralajmëruar se do ta monitorojë vetë zbatimin e vendimit dhe të rekomandimeve.