Pa rroga prej dy muajsh, punëtorët e NPB-së paralajmërojnë ndërprerjen e shërbimeve

"Duam pagat tona." Me këtë kërkesë të vetme, punëtorët e Ndërmarrjes Publike Banesore (NPB) dolën sot në protestë në Prishtinë, duke paralajmëruar se qytetarët mund të mbeten pa shërbimet e tyre nëse pagat nuk paguhen.

Sipas organizatorit të protestës, mbi 380 punëtorë të ndërmarrjes kanë mbetur pa rroga prej dy muajsh. Ai e përshkroi protestën si pikën ku durimi ka marrë fund: "Jemi mbledhur sot këtu për të kërkuar jo privilegje, por atë që na takon me të drejtën tonë: pagën tonë, frytin e punës sonë dhe dinjitetin tonë njerëzor."

Organizatori theksoi se punëtorët kanë vazhduar t'i kryejnë detyrat pavarësisht vonesave dhe se puna e tyre prek drejtpërdrejt jetën e përditshme të kryeqytetit. "NPB-ja është dora e gjatë e qytetit dhe e qytetarëve të saj", tha ai, duke përmendur më shumë se 820 hyrje banimi, 300 ashensorë dhe mbi 15 mijë klientë të rregullt që mbulon ndërmarrja, si dhe punimet në rrugë, shkolla, ambulanca dhe objekte komunale.

Për punëtorët, tha ai, vonesa nuk është çështje burokracie. "Për institucionet, paga mund të jetë çështje administrative, por për ne kjo pagë është buka e familjes dhe siguria e jetesës sonë të përditshme. Nuk po kërkojmë mëshirë, nuk po kërkojmë lëmoshë."

Kërkesa më e drejtpërdrejtë iu adresua kryetarit të Prishtinës, Përparim Rama, pasi Komuna e Prishtinës zotëron 100 për qind të aksioneve të ndërmarrjes. "Duke pasur parasysh se Komuna e Prishtinës është 100 për qind aksionare e ndërmarrjes, kërkojmë publikisht nga kryetari i Prishtinës, zoti Rama, që të ushtrojë autoritetin e tij institucional për të na mbështetur fuqishëm në zgjidhjen e këtyre sfidave jetike që ne punëtorët dhe NPB-ja kemi", u shpreh organizatori.

Në të njëjtën deklaratë erdhi edhe paralajmërimi për qytetarët: "Po ashtu, i njoftojmë qytetarët se, përderisa vazhdon kjo gjendje e mosmarrjes së pagave, jo me dëshirën tonë, do të ndërpriten të gjitha shërbimet tona."

Protestuesit i kërkuan edhe Gjykatës Supreme që ta shqyrtojë me urgjencë lëndën e tyre, natyra e së cilës nuk është bërë e ditur. Ende nuk dihet se si do të përgjigjen komuna dhe kryetari Rama.

Organizatori u bëri thirrje kolegëve të qëndrojnë të bashkuar dhe tha se punëtorët do të vazhdojnë të kërkojnë të drejtën e tyre deri në gjetjen e një zgjidhjeje. "Pagat tona nuk janë privilegj, puna jonë nuk është lëmoshë dhe dinjiteti ynë nuk është për bisedime."