Pa paga, punëtorët teknikë të shkollave të Prishtinës rikthehen në grevë

Punëtorët teknikë të shkollave fillore në Prishtinë hyjnë sërish në grevë nga e mërkura. Arsyeja është e njëjta që i ka shtyrë drejt bojkotit: pagat nuk po u paguhen në përputhje me vendimin e Qeverisë së Kosovës, ndërsa ekzekutimi i tyre po zvarritet.

Vendimi për rikthimin në grevë u mor në një takim ku u ulën përfaqësuesit e punëtorëve teknikë të shkollave fillore dhe të mesme, bashkë me përfaqësuesit e punëtorëve teknikë dhe të sigurimit fizik të Qendrave të Mjekësisë Familjare (QMF) në Prishtinë.

Federata Sindikale e Punëtorëve Teknikë të Sektorit Privat të Kosovës paralajmëron se greva nuk do të ndalet derisa të paguhen pagat dhe të shlyhen të gjitha obligimet e mbetura ndaj punëtorëve.

Përveç grevës, punëtorët kanë njoftuar një protestë për të premten, më 16 tetor, nga ora 11:00 deri në orën 12:00, para objektit të Komunës së Prishtinës. Atje pritet të dalin edhe punëtorët e sigurimit fizik të QMF-ve, të cilët, sipas federatës, kanë më shumë se dy javë që nuk e kanë marrë pagën. Edhe punëtorët teknikë të QMF-ve të kryeqytetit, sipas sindikatës, po shqyrtojnë nëse do t'i bashkohen protestës.

Në shkollat e mesme të Prishtinës, ndërkohë, punëtorët teknikë janë tashmë në grevë.