OVL-UÇK shpalos platformën e veprimit pas aktgjykimit të Hagës, protestë sërish në Prishtinë

Pas aktgjykimit të shkallës së parë të Dhomave të Specializuara në Hagë, Organizata e Veteranëve të Luftës së Ushtrisë Çlirimtare të Kosovës (OVL-UÇK) ka kaluar nga reagimet publike në një dokument strategjik: "Platforma e Veprimit të OVL-UÇK-së pas përgjegjësimit të shkallës së parë të Dhomave të Specializuara", ku shpalosen qëllimet, kërkesat dhe mënyra e veprimit të organizatës.

Platformën e prezantoi Fatmir Sopi, në emër të OVL-UÇK-së. "Qëllimi i Platformës është që OVL-UÇK ta shndërrojë reagimin pas aktgjykimit në veprim të organizuar, profesional dhe të vazhdueshëm", deklaroi ai.

Sipas Sopit, prioritetet e dokumentit përfshijnë mbrojtjen në Apel, monitorimin e të drejtave të të akuzuarve, ruajtjen e debatit demokratik, amendamentimin ose shfuqizimin e Ligjit nr. 05/L-053 për Dhomat e Specializuara, kërkimin e përgjegjësisë politike, pjesëmarrjen qytetare paqësore, angazhimin ndërkombëtar dhe dokumentimin e historisë së UÇK-së.

Një nga pikat më të ndjeshme është kërkesa për rivlerësim institucional të Dhomave të Specializuara. "Rivlerësimi institucional i Dhomave duhet të analizojë raportin ndërmjet arsyeve që çuan në krijimin e mekanizmit, përfshirë pretendimet e raportit të Këshillit të Evropës për trajtimin e gjerë të organeve, mandatit më të gjerë që iu dha më pas Dhomave, akuzave të ngritura dhe rezultateve konkrete të proceseve", theksoi Sopi.

Për zbatim, platforma parashikon krijimin e një Këshilli Koordinues të Veprimit nën përgjegjësinë e Kryesisë së OVL-UÇK-së. "Për zbatimin e Platformës duhet të krijohet Këshilli Koordinues i Veprimit nën përgjegjësinë e Kryesisë së OVL-UÇK-së. Ai përcakton prioritetet, koordinon ekipet, miraton dokumentet strategjike dhe raporton për rezultatet", thotë Sopi.

Nën këtë strukturë parashihen katër ekipe. Ekipi Juridik dhe për Mbrojtjen do të merret me analizimin e aktgjykimit, qëndrimeve të Apelit, standardit të provës dhe garancive procedurale. "Përgatit Memorandumin Juridik për amendamentimin ose shfuqizimin e Ligjit nr. 05/L-053, përfshirë analizën e nenit 162 të Kushtetutës dhe pasojat e secilës alternative", thuhet në platformë. Ekipi Institucional dhe për Veprim Qytetar, nga ana tjetër, do të përgatisë dhe dorëzojë kërkesa në Kuvend, Qeveri dhe Presidencë, do të përcjellë përgjigjet institucionale dhe do të organizojë peticione e protesta paqësore.

Kërkesa kryesore mbetet amendamentimi ose shfuqizimi i Ligjit nr. 05/L-053, i mbështetur në një memorandum juridik që analizon bazën kushtetuese, dëshmitë relevante dhe pasojat e secilës alternativë.

Platforma parashikon edhe mbështetje juridike dhe financiare për proceset në Apel: avokatë, ekspertë, hetues, analiza të provave, përkthime dhe ekspertiza të specializuara. Organizata kërkon që çdo kufizim që pretendohet se cenon efektivitetin e mbrojtjes të dokumentohet dhe të trajtohet institucionalisht, ndërsa Fondi i Solidaritetit, sipas dokumentit, duhet të shërbejë vetëm si mbështetje plotësuese, me auditim dhe transparencë të plotë.