ReklamëHapësirë reklame
ReklamëHapësirë reklame
Reklamë
Skandali i mbetjeve të rrezikshme të hedhura paligjshëm në Gospiç ka arritur në Kuvendin kroat: presidenti Milanoviq kërkon katër vendime urgjente, ndërsa Oda Ekonomike Kroate mohon çdo lidhje me kanalin e dyshuar të mbeturinave.
Kuvendi i Kroacisë nis sot një mbledhje të jashtëzakonshme dyditore për mbetjet e rrezikshme të hedhura në mënyrë të paligjshme në zonën e Gospiçit dhe të qarkut Lika-Senj, si dhe për rrezikun e mundshëm ndaj shëndetit të njerëzve dhe mjedisit.
Seancën e ka thirrur kryetari i Kuvendit, Gordan Jandrokoviq, me kërkesë të presidentit të Republikës, Zoran Milanoviq. Presidenti ka propozuar katër vendime konkrete që synojnë të detyrojnë institucionet të veprojnë menjëherë.
Me vendimin e parë, Kuvendi do ta detyronte Qeverinë të nisë pa vonesë sanimin e përhershëm të deponisë në Gospiç dhe të vendosë mbikëqyrje të vazhdueshme mbi ndotjen e ujërave nëntokësore dhe ndryshimet e tjera në mjedis. Për masat e ndërmarra dhe gjetjet, Qeveria do të duhej ta informonte Kuvendin brenda 15 ditësh, e më pas çdo 30 ditë.
Vendimi i dytë kërkon që Qeveria, brenda tre ditësh, të presë përfaqësuesit e qytetarëve dhe të nismave qytetare, t'i njoftojë ata për gjendjen dhe masat e planifikuara dhe të informojë vazhdimisht opinionin publik. Vendimi i tretë i kërkon Qeverisë që, më së voni brenda 15 ditësh, të emërojë kryeinspektorin shtetëror.
Me vendimin e katërt, Inspektorati Shtetëror do të detyrohej të fillojë menjëherë kontrollin e të gjitha deponive në Kroaci për të cilat ekziston dyshimi i bazuar se përmbajnë mbetje të rrezikshme ose të hedhura në kundërshtim me ligjin. Raportin për rezultatet e kontrollit ai do të duhej t'ia paraqiste Kuvendit brenda tre muajsh.
Ndërkohë, çështja ka marrë edhe një dimension politik. Deputetët e partisë Most kanë pretenduar se gjurma e mbetjeve të rrezikshme çon deri te Shoqata për lëndët e para sekondare, grumbullimin dhe përpunimin pranë Odës Ekonomike Kroate (HGK). Nga HGK-ja i kanë hedhur poshtë këto pretendime, duke theksuar se shoqata nuk merret me vendime individuale biznesi.
"Temat me të cilat vepron Shoqata janë ato që prekin të gjithë veprimtarinë, ndërsa nuk merret me vendime individuale biznesi as me interesa të veçanta", thuhet në komunikatën e HGK-së. Në të, shtohet gjithashtu se në Bursën e mbetjeve nuk janë evidentuar shpallje të kompanive që lidhen me Josip Shincekun.
Odaja ka kujtuar se kërkesën e Fondit për mbrojtjen e mjedisit dhe efikasitetin energjetik për shprehjen e interesit për trajtimin e mbetjeve ia kanë përcjellë të gjitha anëtareve të shoqatës evropiane të odave, Eurochambres, "me qëllim zgjidhjen më të shpejtë të situatës në Gospiç dhe gjetjen e ofertuesit adekuat". Sipas komunikatës, HGK-ja ka kërkuar edhe rritjen e transparencës dhe kontroll më të mirë të përpunimit në impiantet e ndarjes, "për sa kohë që niveli i tyre teknologjik nuk e mundëson një shkallë të tillë kontrolli".
Deputeti i Mostit, Zvonimir Troskot, ka kërkuar të hetohet nëse "e ashtuquajtura Odë Digjitale, përkatësisht Bursa e mbetjeve, i ka shërbyer qëllimit të saj ligjor apo nëpërmjet saj është zhvilluar një sistem me anë të të cilit mbetjet përfundonin në deponi të paligjshme". Nga HGK-ja janë përgjigjur se Bursën e mbetjeve kanë qenë të detyruar ta zhvillonin dhe ta zbatonin mbi bazën e Planit qeveritar për menaxhimin e mbetjeve, dhe se ajo më vonë u bë pjesë e Odës së tyre Digjitale.
"Skenari se njëra ka lindur për shkak të tjetrës nuk është i saktë. Bursa e mbetjeve nuk është qendra e shkëmbimit të të gjitha mbetjeve në Kroaci, edhe pse ne, si mbrojtës të zhvillimit të qëndrueshëm dhe të ekonomisë qarkore, do të donim që menaxhimi i mbetjeve të optimizohej sa më shumë të jetë e mundur", kanë theksuar nga Odaja.
Ata kanë sqaruar se Bursa nuk është e detyrueshme, por funksionon si një shpallës i specializuar ku dikush mund, por nuk është i detyruar të publikojë një shpallje. Sipas HGK-së, Shoqata nuk e menaxhon atë, ndërsa për përmbajtjen e shpalljeve përgjigjen subjektet e biznesit që i kanë publikuar. "Në Bursën e mbetjeve nuk janë evidentuar shpallje të kompanive që lidhen me Josip Shincekun", kanë nënvizuar.
Gurë kalldrëmi të shkulur nga Parku Rinia, gaz lotsjellës dhe mbi 100 të arrestuar: protestat kundër qeverisë në Shqipëri hynë në ditën e shtatë pa asnjë shenjë qetësimi. Kryeministri Rama i quan pjesë të një sulmi të koordinuar, ndërsa protestuesit fajësojnë policinë për dhunën.
