Osmani u kërkon Shaheen e Durbin NATO-n dhe mbrojtjen e së vërtetës për luftën

Ish-presidentja e Kosovës, Vjosa Osmani, ka kërkuar nga senatorët amerikanë Jeanne Shaheen dhe Dick Durbin mbështetje për rrugën e Kosovës drejt NATO-s dhe për nisjen e dialogut strategjik me Shtetet e Bashkuara të Amerikës. Takimi u zhvillua gjatë vizitës së dy senatorëve në Kosovë.

Në një postim për takimin, Osmani e lidhi dialogun strategjik me periudhën kur ishte në krye të shtetit. "I falënderova senatorët për një sërë nismash që kanë mbështetur dhe shtyrë përpara në Senatin amerikan, në funksion të paqes, sigurisë dhe stabilitetit në rajonin tonë. Kërkova mbështetjen e tyre për rrugën e Kosovës drejt anëtarësimit në NATO dhe për nisjen e dialogut strategjik me Shtetet e Bashkuara të Amerikës, proces të cilin e patëm iniciuar zyrtarisht gjatë mandatit tim presidencial", shkroi ajo.

Osmani u shpreh me fjalë të ngrohta për të dy ligjvënësit amerikanë, veçanërisht për senatoren Shaheen, me të cilën thotë se ka pasur kontakte të shpeshta. "Në dhjetëra takime e biseda që kemi zhvilluar gjatë viteve të fundit, senatorja Shaheen ka dëshmuar se është një mbështetëse e palëkundur e Kosovës dhe e rrugës sonë euroatlantike. Jam e lumtur që kësaj radhe asaj iu bashkua edhe senatori Durbin, i cili gjithmonë ka qenë në mbështetje të vendit tonë", deklaroi ish-presidentja.

Një pjesë e rëndësishme e bisedës, sipas Osmanit, iu kushtua narrativës për luftën e Kosovës. Ajo u kërkoi senatorëve të qëndrojnë në mbrojtje të së vërtetës për luftën çlirimtare, duke akuzuar Serbinë për përpjekje të vazhdueshme për të rishkruar historinë. "Nuk duhet të lejojmë kurrë që viktima, populli i Kosovës, dhe agresori, regjimi serb, të barazohen apo të vendosen në të njëjtin rrafsh moral. E vërteta historike nuk mund të relativizohet dhe drejtësia nuk mund të ndërtohet mbi shtrembërimin e saj", theksoi ajo.

Osmani tha se para senatorëve kundërshtoi edhe pretendimet se në Kosovë ushtrohet represion ndaj të krishterëve, të cilat ajo i quajti të rreme dhe produkt të propagandës serbe. Sipas saj, kjo është "narrativë e rrezikshme, që po promovohet me këmbëngulje nga qarqe në Serbi" dhe që, siç shkroi, duhet të përballet nga çdo institucion i Republikës së Kosovës me fakte dhe argumente.

"Liria fetare, bashkëjetesa dhe respektimi i të drejtave të të gjithëve janë vlera të Kosovës që nuk mund të njollosen nga propaganda", përfundoi Osmani.