Ortek vdekjeprurës në Kaukaz: 17 alpinistë të vdekur, 33 u kapën nga masa e dëborës

Bilanci i ortekut që goditi grykën e Bezengit, në Kaukaz, është ngritur në të paktën 17 të vdekur. Ministria e Situatave të Emergjencës e republikës ruse të Kabardino-Balkarisë njoftoi se u lokalizua edhe një trup tjetër, i shtatëmbëdhjeti, i cili u transportua me helikopter deri në Nalçik.

Masa e dëborës u shkëput të dielën e kaluar, më 6 shtator, dhe zuri në befasi 33 alpinistë. Vetëm 10 prej tyre arritën të zbresin me forcat e veta, disa me lëndime.

Që nga ai moment është vënë në lëvizje një operacion kërkimi e shpëtimi me mbi 50 punonjës të emergjencave, të angazhuar për gjetjen e personave të zhdukur. Terreni i vështirë dhe rreziku i lartë i orteqeve të reja i kanë penguar ndjeshëm përpjekjet e skuadrave në terren.

Gryka e Bezengit ndodhet në zonën kufitare kaukaziane mes Rusisë dhe Gjeorgjisë, një nga rajonet më të larta dhe më të vështira për alpinizëm. Identiteti dhe shtetësia e alpinistëve të goditur nga orteku nuk janë bërë publike.