Ora po ikën për presidentin: Kurti del sërish para mediave, PDK s'lëviz nga Speciale

Kryeministri Kurti do të dalë sonte, në orën 19:45, sërish para gazetarëve, në një mbrëmje kur afati për zgjedhjen e presidentit të ri të Kosovës skadon në mesnatë dhe një marrëveshje ende nuk është arritur.

Njoftimin e dha zëdhënësi i Qeverisë, Arlind Manxhuka: "Sonte, në 19:45, Kryeministri Kurti mban konferencë për media." Konferenca do të mbahet në Zyrën e Kryeministrit, ndërsa tema e saj nuk është bërë publike.

Dalja e re e Kurtit vjen pas një shkëmbimi qëndrimesh që po zhvillohet jo në tryezë, por përmes konferencave për media. Kurti kishte ofruar që fillimisht të votohej Bekim Sejdiu, kandidati që ai ka propozuar për president, dhe vetëm pas kësaj të kalonin ndryshimet e propozuara në ligjin për Gjykatën Speciale të Kosovës në Hagë.

Kryetari i Partisë Demokratike të Kosovës, Bedri Hamza, nuk e pranoi këtë renditje. Duke folur në një konferencë për media pas ofertës së Kurtit, ai tha se partia e tij mbetet në qëndrimin e njëjtë: ndryshimet në ligjin për Gjykatën Speciale duhet së pari të kalojnë edhe në lexim të dytë. Sipas Hamzës, kërkesa e PDK-së nuk mund të lidhet me zgjedhjen e presidentit të ri.

Me secilën palë në qëndrimin e vet dhe me vetëm pak orë deri në mesnatë, deri tani nuk është bërë e ditur asnjë zgjidhje përfundimtare për zgjedhjen e presidentit.