Opozita lëshon sallën e Kuvendit, votimet vazhdojnë vetëm me VV-në dhe Listën Serbe

Deputetët e PDK-së, LDK-së dhe Aleancës e kanë lëshuar sallën e Kuvendit të Kosovës gjatë seancës plenare që është ende në zhvillim. Votimi i pikave të rendit të ditës nuk është ndërprerë: në sallë kanë mbetur vetëm deputetët e VV-së, të Listës Serbe dhe të grupit multietnik, të cilët po vazhdojnë me votimet.

Largimi erdhi menjëherë pas përfundimit të debatit, që ishte gjithashtu pjesë e rendit të ditës së seancës.

Në çastin kur u larguan deputetët e Partisë Demokratike të Kosovës, Kuvendi po shqyrtonte pikën për përzgjedhjen e dy anëtarëve joekzekutivë të Bordit të Bankës Qendrore të Republikës së Kosovës. Deputetët e PDK-së nuk kanë dhënë asnjë shpjegim për arsyet e lëshimit të sallës.

Nuk dihet ende nëse partitë opozitare do të rikthehen në seancë para përfundimit të votimeve.