ReklamëHapësirë reklame
ReklamëHapësirë reklame
Reklamë
Pas tri javësh hetimi me metoda proaktive, policia në Korçë ndaloi në aksin "Korçë-Bilisht" një automjet që transportonte drejt Tiranës gjashtë emigrantë nga Sudani, kundrejt një tarife 600-700 euro për kokë. Shoferi 23-vjeçar nga Sukthi i Durrësit është nën akuzë për ndihmë në kalim të paligjshëm të kufijve.
Në afërsi të fshatit Progër, në aksin rrugor "Korçë-Bilisht", shërbimet e policisë ndaluan mbrëmjen e të mërkurës një automjet me gjashtë emigrantë nga Sudani në bord. Sipas Policisë së Shtetit, drejtuesi i mjetit i transportonte drejt Tiranës kundrejt një pagese prej 600-700 eurosh për çdo person, ndërsa udhëtarët synonin të kalonin ilegalisht kufirin.
Kapja në flagrancë ishte akti i fundit i operacionit të koduar "Route", të organizuar dhe finalizuar nga Seksionin për Hetimin e Trafiqeve të Paligjshme të Drejtorisë Vendore të Policisë Korçë, pas tri javësh hetimi me metoda proaktive. Operacioni u zhvillua në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Korçë dhe në bashkëpunim me Forcën e Posaçme "Shqiponja".
I arrestuari është shtetasi K. M., 23 vjeç, banues në fshatin Sukth të Durrësit, i cili, sipas policisë, dyshohet për veprën penale "Ndihma për kalim të paligjshëm të kufijve". Ndaj tij nuk ka ende vendim gjykate. Gjatë veprimeve procedurale u sekuestruan automjeti, shtatë telefona celularë dhe një shumë parash. Materialet procedurale iu referuan Prokurorisë së Korçës.
Goditja në Korçë është pjesë e një bilanci më të gjerë 24-orësh të Policisë së Shtetit, sipas të cilit u finalizuan katër operacione, në Tiranë, Elbasan, Korçë dhe Lezhë, kundër veprimtarive kriminale në fushën e narkotikëve, organizimit të kundërligjshëm të lojërave të fatit dhe dhënies së ndihmës emigrantëve për kalim të paligjshëm të kufirit. Gjatë kësaj periudhe u kapën edhe tre shtetas që ishin në kërkim për vepra të ndryshme penale.
Në Shkodër, specialistët për Hetimin e Krimeve ndaj Personit ekzekutuan masën e sigurisë "Arrest në burg" për shtetasin P. F., 50 vjeç, i cili u vetëdorëzua. Masa është caktuar nga Gjykata e Shkodrës për veprat penale "Vrasja në rrethana të tjera cilësuese", mbetur në tentativë, dhe "Mbajtja pa leje dhe prodhimi i armëve, armëve shpërthyese dhe municionit".
Në fushën e narkotikëve janë goditur 19 raste, me një shtetas të arrestuar dhe 11 të proceduar në gjendje të lirë, ndërsa për tetë raste po punohet për identifikimin dhe kapjen e autorëve. Dy shtetas, kryepleq të dy fshatrave në Krujë, u proceduan në gjendje të lirë për veprën penale "Shpërdorimi i detyrës", pasi në zonat përkatëse u konstatuan bimë narkotike të kultivuara. Si provë materiale u sekuestruan sasi të lëndëve të dyshuara narkotike kokainë dhe kanabis sativa, ndërsa bimët narkotike të kultivuara u asgjësuan.
Krimet ndaj personit numërojnë 14 raste, me 17 shtetas të proceduar në gjendje të lirë. Në fshatin Gostimë të Cërrikut u arrestua një 31-vjeçar për veprën penale "Shkelja e rregullave të mbrojtjes në punë": ai po punonte me një kombajnë bujqësore në tokën e një 66-vjeçari, i cili dyshohet se aksidentalisht është penguar tek mjeti dhe ka pësuar dëmtime fizike. Aktualisht 66-vjeçari është jashtë rrezikut për jetën.
Në fushën e krimeve kundër pronës janë evidentuar 14 raste, me një shtetas të arrestuar, tetë të proceduar në gjendje të lirë dhe dy në kërkim, ndërsa për tre raste vazhdon puna për identifikimin e autorëve. Në Tiranë u arrestua një 33-vjeçar, pasi u konstatua duke kryer punime pa leje në një pallat, nga të cilat po dëmtohej fasada e ndërtesës. Penalisht u procedua edhe administratori i kompanisë që po kryente punimet pa leje.
Tetë raste janë regjistruar për krime kundër mjedisit, me shtatë shtetas të proceduar në gjendje të lirë dhe një rast në hetim për identifikimin e autorit. Në fshatin Zall-Herr të Kamzës u arrestua në flagrancë një 28-vjeçar, i dyshuar se kishte djegur me benzinë një sasi kabllosh elektrike pranë një sipërfaqeje toke me shkurre dhe ferra, duke rrezikuar përhapjen e zjarrit në pyll.
Bilanci përfshin edhe dy raste të dhunës në familje, me tre shtetas të proceduar në gjendje të lirë, dhe nëntë kërkesa-padi të plotësuara për lëshimin e urdhrave të mbrojtjes. Në fushën e krimeve ekonomike janë evidentuar 11 raste, me 10 shtetas të proceduar në gjendje të lirë dhe një në kërkim, ndërsa për krime kibernetike është regjistruar një rast, me një shtetase të proceduar në gjendje të lirë.
Pesë shtetas u proceduan penalisht për drejtim të automjetit në gjendje të dehur dhe/ose pa patentë. Një shtetas u arrestua dhe pesë të tjerë u proceduan penalisht si të dyshuar për shkelje të rregullave të qarkullimit rrugor, ndërsa një prej tyre u largua nga vendi i aksidentit. Dy shtetas u arrestuan dhe një u procedua penalisht për thyerje të masës së sigurisë "Arrest në shtëpi". Për arrestimin e shtetasit A. H., 46 vjeç, në Tiranë, policia bashkëpunoi me stafin e emisionit "Stop". Një shtetas u arrestua dhe një tjetër u procedua penalisht për kundërshtim të urdhrit të punonjësve të policisë ose të një punonjësi tjetër që kryen një detyrë shtetërore apo shërbim publik, ndërsa një shtetas u shpall në kërkim dhe 11 të tjerë u proceduan penalisht për vepra të ndryshme penale.
Shërbimet e Policisë Kufitare kapën një shtetase që ishte në kërkim, arrestuan një shtetas dhe procedheruan penalisht një person për falsifikim dokumentesh dhe një tjetër për kalim të paligjshëm të kufirit. Në Tiranë u procedua penalisht një shtetas gjerman, pasi në lokalin e tij kishte punësuar në mënyrë të paligjshme gjashtë shtetas të huaj dhe fshihte të ardhurat e përfituara nga aktiviteti.
Në Durrës, pas njoftimit për një jaht të bllokuar në det pranë Shkëmbit të Kavajës, Policia Kufitare u nis menjëherë në adresën e dhënë. Pasi lokalizoi mjetin lundrues, që kishte pësuar defekt në motor, e tërhoqi me anijen e vetë policisë deri në Portin e Durrësit dhe transportoi tre shtetasit që ndodheshin në bord, të cilët janë në gjendje të mirë shëndetësore.
Policia e Shtetit ftoi qytetarët të denoncojnë çdo rast paligjshmërie në numrin pa pagesë 112, duke garantuar reagim profesional e të shpejtë dhe ruajtjen e anonimatit.
Dy burra nga fshati Sinë dyshohet se u përplasën me dhunë me dy policë ndërsa po shoqëroheshin në komisariat. Në të njëjtin bulevard të Peshkopisë, një 36-vjeçar u kap me thikë dhe shufër metalike.
