Operacioni "Fugitive" në Gjirokastër: në pranga 43-vjeçari i kërkuar nga Spanja

Një shtetas 43-vjeçar, i shpallur në kërkim ndërkombëtar për llogari të drejtësisë spanjolle, ka rënë në pranga në Gjirokastër, në kuadër të një faze të re të operacionit policor të koduar "Fugitive".

Sipas Policisë së Gjirokastrës, aksioni u realizua nga Seksioni për Hetimin e Narkotikëve dhe Trafiqeve të Paligjshme, në bashkëpunim me Sektorin Operacional të Drejtorisë Vendore të Policisë Gjirokastër. Pas sigurimit të informacioneve në rrugë operative për vendndodhjen e personit të kërkuar, strukturat e policisë bënë të mundur lokalizimin dhe arrestimin me qëllim ekstradimi të shtetasit të identifikuar me inicialet K. B., 43 vjeç.

Ndaj tij, Gjykata e Sabadellit në Spanjë ka caktuar në qershor të vitit 2025 masën e sigurisë "Arrest në burg", nën akuzat për veprat penale të kultivimit të bimëve narkotike dhe vjedhjes së energjisë elektrike.

Në vijim të veprimeve, Interpol Tirana po bashkëpunon ngushtë me homologët e Interpol Madridit për të finalizuar procedurat e ekstradimit të shtetasit shqiptar drejt Spanjës.