Operacion antidrogë në Korçë: pranga një personi, sekuestrohen kokainë, para dhe municione

Në automjetin dhe në banesën e një personi të arrestuar, efektivët e policisë gjetën doza kokaine, një shumë parash, armë të ftohta dhe fishekë. Kjo është gjetja e parë e një operacioni antidrogë që Drejtoria Vendore e Policisë Korçë e ka nisur në rajonin juglindor të vendit.

Sipas policisë, operacioni synon të godasë personat e përfshirë në shpërndarjen dhe shitjen e lëndëve narkotike. Deri tani, gjatë veprimeve operative, është bërë i mundur arrestimi i një personi.

Aksioni policor është ende në zhvillim. Policia po vazhdon kontrollet në disa banesa të tjera, me qëllim identifikimin dhe kapjen e personave të tjerë të dyshuar si të përfshirë në këtë veprimtari kriminale.