Ohër: Arrestohet një 33-vjeçar, dyshohet se përdhunoi një turiste suedeze në një klub nate

Një klub nate në Ohër është bërë skena e një denoncimi të rëndë: një 21-vjeçare, shtetase e Suedisë, ka njoftuar policinë se është përdhunuar gjatë natës mes 8 dhe 9 gushtit. Bazuar në kallëzimin e saj, autoritetet kanë ndaluar një 33-vjeçar nga Velesi.

I dyshuari akuzohet për veprën penale "përdhunim". Sipas denoncimit të viktimës, ai dyshohet se ka kryer marrëdhënie seksuale pa pëlqimin e saj brenda ambienteve të klubit.

Nga Ministria e Punëve të Brendshme (MPB) bëjnë të ditur se, pas zbardhjes dhe dokumentimit të plotë të rastit, ndaj 33-vjeçarit do të parashtrohet kallëzim penal në prokurorinë kompetente.

Ndaj të ndaluarit deri tani rëndon vetëm dyshimi; ai nuk është shpallur fajtor dhe rasti kalon në duart e organeve të drejtësisë.