Nxënësit ecin në këmbë me çanta në shpinë, protesta bllokon aksin Prishtinë-Fushë Kosovë

Fëmijë me çanta të rënda në shpinë, duke ecur në këmbë nga Prishtina drejt Fushë Kosovës. Kjo është pamja që ka lënë pas bllokimi i disa prej rrugëve kryesore që lidhin kryeqytetin me Fushë Kosovën, si pasojë e protestës kundër aktgjykimit të Gjykatës Speciale.

Qarkullimi është ndërprerë në të dy kahet, Prishtinë-Fushë Kosovë dhe anasjelltas. Pikat e bllokuara janë rrethi i Kazermës "Adem Jashari" dhe rrethi në anën tjetër, dy nyje që mbajnë peshën kryesore të lëvizjes ndërmjet dy qyteteve.

Pasojat i kanë ndier më shumë nxënësit që udhëtojnë nga Prishtina drejt shtëpive të tyre në Fushë Kosovë dhe në zonat përreth. Me linjat e transportit të ngecura, një pjesë e tyre janë detyruar të vazhdojnë rrugën në këmbë deri në shtëpi.

Protestuesit kundër aktgjykimit të Gjykatës Speciale kanë mbajtur të mbyllura rrugët, ndërsa nuk ka njoftim nga policia apo institucionet e tjera për kohëzgjatjen e bllokimit dhe për rrugët alternative.