"Nuk ndalemi": protestat për ish-krerët e UÇK-së vazhdojnë, sot dy tubime

Sheshet nuk po zbrazen. Platforma qytetare "Liria Ka Emër", organizatore e tubimeve në mbështetje të ish-drejtuesve të Ushtrisë Çlirimtare të Kosovës (UÇK), ka paralajmëruar se prania qytetare do të vazhdojë derisa të arrihet synimi i saj.

"Çfarë populli! Nuk ndalemi. Çdo ditë e çdo natë në shesh, deri në liri. Për çlirimtarët tanë", thuhet në postimin e platformës në rrjetet sociale.

Sot protesta zhvillohet në dy kohë të ndryshme. Aktivisti Çlirim Haziri ka njoftuar se protesta e studentëve nis në orën 12:00 në sheshin "Skënderbeu", ndërsa në orën 21:00 mbahet nata e gjashtë e protestës.

"Shihemi në protestën e studentëve, në orën 12:00, në sheshin 'Skënderbeu', për të vazhduar në mbrëmje, në orën 21:00, me natën e 6-të të protestës", ka shkruar Haziri, duke ftuar qytetarët t'u bashkohen tubimeve edhe sot.

Në një postim tjetër, ai ka vlerësuar se pjesëmarrja po rritet nga një natë në tjetrën: "Çdo natë e më shumë, më të bashkuar, më të vendosur. Faleminderit, shqiptarë!".

Protestat po mbahen si kundërshtim ndaj vendimit të Gjykatës Speciale, ndërsa organizatorët kanë përsëritur se tubimet në sheshet e kryeqytetit do të vijojnë pa ndërprerje.