Nju Jorku voton ndalimin e karrocave me kuaj pas vdekjes së një 18-vjeçari

Një karrocë turistike që përmbyset në Central Park, një 18-vjeçar që humb jetën dhe një industri 150-vjeçare që tani rrezikon të zhduket. Këshilli i Qytetit të Nju Jorkut pritet të vendosë të enjten mbi një projektligj që do të ndalonte karrocat me kuaj në qytet, në një votim që konsiderohet historik.

Aksidenti ndodhi në qershor. Karrocieri u largua nga kali për të bërë një fotografi familjare. Diçka e trembi kafshën, e cila u nis me vrap dhe e përmbysi karrocën. Në rrëzim mbeti i vdekur Romanch Mahajan, 18 vjeç, i cili ndodhej në një shëtitje turistike nëpër park.

Babai i tij, Deepak Mahajan, foli përmes një videotelefonate nga India. "Ishte shumë zemërthyese", tha ai. "Nuk arritëm ta shpëtonim fëmijën tonë." Sipas tij, votimi do të jetë pjesë e trashëgimisë që lë djali i tij.

Ideja e ndalimit nuk është e re. Tre kryetarë bashkie radhazi kanë kërkuar t'u jepet fund karrocave me kuaj në Nju Jork, por pas vdekjes së të riut lëvizja mori hov të ri. Projektligji u riemërtua "Ligji i Romanch-it" dhe ka mbështetje të gjerë: më shumë se gjysma e anëtarëve të Këshillit të Qytetit figurojnë si sponsorë të tij. Të gjitha shenjat tregojnë se ndalimi do të miratohet.

Kundërshtimi vjen nga Sindikata e Punëtorëve të Transportit (TWU), që përfaqëson karrocierët. Të mërkurën ajo shpërndau një letër ku premton ta kundërshtojë ligjin në gjykatë si antikushtetues, me argumentin se ai nuk garanton asnjë kompensim për investimet e humbura. "Pronarët e karrocave me kuaj kanë medalione, njësoj si medalionet e taksive, të cilat i blenë për shumë mijëra dollarë", shkruajnë avokatët e sindikatës. "Projektligji në pritje thjesht thotë: 'Puf, medalioni juaj tani nuk vlen asgjë.'"

Për familjen Mahajan, miratimi i ligjit do të ishte një ngushëllim i vogël, nëse rrugët e Nju Jorkut bëhen më të sigurta. "Ne duam një ndalim të plotë të karrocave me kuaj këtu në Nju Jork", tha babai. "Nuk mund ta kthejmë Romanch-in, por mund të përpiqemi të sigurojmë që asnjë familje tjetër të mos vuajë atë që kemi vuajtur ne."

Disa nga të afërmit e të riut pritet të jenë të pranishëm në seancën e së enjtes për të ndjekur votimin. Edhe nëse miratohet, ndalimi nuk do të hyjë plotësisht në fuqi para qershorit 2028, kur skadojnë të gjitha licencat ekzistuese për karrocat me kuaj.