Njësia A4 kthehet në rrjet: "Kosova A" rinis prodhimin pas sanimeve teknike

Në orën 04:00 të këtij mëngjesi ka nisur startimi i njësisë A4 të Termocentralit "Kosova A", pas përfundimit me sukses të sanimeve teknike. Rreth orës 08:30 njësia është sinkronizuar me rrjetin, duke u rikthyer kështu në prodhimin e energjisë elektrike.

Rikthimi në operim ishte planifikuar mbrëmë nga Korporata Energjetike e Kosovës, e cila bën të ditur se aktualisht njësia A4 është në operim dhe se gjendja e saj është stabile.

Në njoftimin e saj, KEK-u ka falënderuar veçanërisht punonjësit që mbajtën njësinë në këmbë: "Një falënderim i veçantë për stafin teknik dhe të gjithë punonjësit e Termocentralit "Kosova A", për përkushtimin, profesionalizmin dhe gatishmërinë e vazhdueshme për të qenë në krye të detyrës dhe për të kontribuar në mbajtjen e njësive në operim.

Puna dhe përkushtimi i vazhdueshëm i stafit janë thelbësorë për sigurinë dhe stabilitetin e prodhimit të energjisë elektrike", thuhet në njoftimin e korporatës.