Makinisti e pa objektin, por ishte vonë: 140 km/h dhe përplasja që nxori trenin nga shinat

Makinisti e pa objektin mbi binarë, por ishte tepër vonë: treni rajonal që lidhte Caen me Rouen ecte me 140 kilometra në orë. Përplasja e nxori atë nga shinat mbrëmjen e së premtes, 11 shtator, në Normandi të Francës.

Objekti ishte një copë shine e gjatë pesë metra dhe e rëndë 300 kilogramë, e vendosur mbi shinën paralele me linjën, në lartësinë e komunës së Cléon, në Seine-Maritime. Kështu e përshkruajnë disa bashkëbisedues brenda SNCF-së, hekurudhave franceze. Mbi këtë bazë, hetimi po orientohet drejt pistës së një akti të qëllimshëm, me hipotezën e një veprimi dashakeq si më të privilegjuarën. Ende nuk janë bërë të ditura as identiteti i një autori të mundshëm, as përfundimet e hetimit.

Ora ishte rreth 19:45 dhe ende nuk kishte rënë nata. Kabina e lokomotivës përfundoi e përmbysur jashtë binarëve. "Kabina u shtri dhe përfundoi në pyll [në afërsi të binarëve], makinisti është shumë i tronditur, por pësoi vetëm një brinjë të çarë", tha një burim sindikal. Vetë makinisti, në një mesazh dërguar kolegëve gjatë natës, u shpreh se ishte "i shpëtuar për mrekulli" ("miraculé").

Nga aksidenti u lënduan gjithsej 44 persona. Një vajzë 18-vjeçare u plagos rëndë dhe u transportua me helikopter në orët e para të mbrëmjes drejt spitalit universitar të Rouen-it. Të shtunën në mëngjes, prokurori i Republikës në Rouen siguroi se jeta e saj nuk është më në rrezik.

Për përballimin e situatës, prefekti aktivizoi planin Orsec për "shumë viktima", në kuadër të të cilit u angazhuan 130 zjarrfikës dhe 80 automjete.