Një muaj në detyrë, Qeveria Kurti ende pa Program Qeverisës: opozita flet për improvizim

Ka ligje, ka premtime, por nuk ka hartë. Qeveria e udhëhequr nga kryeministri Albin Kurti mori mandatin më 13 shtator dhe që atëherë ka proceduar me dhjetëra ligje në Kuvend, por një muaj më vonë ende nuk e ka miratuar Programin Qeverisës. Ky është dokumenti bazë që, sipas Ligjit për Qeverinë, drejton punën e ekzekutivit për katër vjet dhe përbën premtimin zyrtar para qytetarëve.

Opozita e ka kthyer këtë mungesë në shënjestër. Ligjvënësja e Partisë Demokratike, Blerta Deliu-Kodra, pohon se procedurat për përpilimin e programit nuk kanë nisur ende. "Në muajin e pestë pas zgjedhjeve, Qeveria ende nuk ka paraqitur për diskutim publik e parlamentar një program që tregon drejtimin e vendit. Ligjet duhet t’i shërbejnë një qëllimi të qartë: zhvillimit ekonomik, sigurisë energjetike, mbështetjes së bizneseve dhe një jete më të mirë për qytetarët. Kur mungon ky drejtim, lista e ligjeve mbetet një inventar nismash të vjetra. Kosovës i duhet qeverisje me plan, afate e përgjegjësi. Koha po kalon, ndërsa përgjigjet ende mungojnë", tha ajo.

Në të njëjtën linjë është edhe shefi i deputetëve të Aleancës, Besnik Tahiri, i cili paralajmëron se pa program Qeveria do të merret vetëm me improvizime. "Një qeveri pa program është pa identitet, ndërsa një qeveri pa prioritete legjislative mbetet edhe pa letërnjoftim politik. Problemi nuk është vetëm mungesa e një dokumenti, por mungesa e përgjigjeve ndaj problemeve në energji, ekonominë, mirëqenien e qytetarëve, sektorin privat dhe sfidat integruese. Gjithçka po mbetet në improvizim", deklaroi Tahiri.

Vonesa nuk është e re. Ekzekutivi aktual është vazhdimësi e Qeverisë Kurti 3, e cila doli nga zgjedhjet e 28 dhjetorit të vitit të kaluar. Edhe gjatë periudhës së shkurtër dymujore me mandat të plotë në fillim të vitit, Qeveria nuk miratoi Program Qeverisës. Zgjedhja e presidentes e largoi rrezikun e zgjedhjeve të jashtëzakonshme, pas gati dy vjetësh pa stabilitet institucional, gjatë të cilëve janë grumbulluar punë e probleme që presin zgjidhje.

Pikërisht ky ngërç i gjatë, sipas gazetarit Fitim Gashi, e bën më të nevojshme qartësinë në drejtimin e Qeverisë. Gashi kujton premtimet e mëdha të ekspozesë dhe kërkon që ato të lidhen me afate konkrete dhe burime të përcaktuara financiare. "Në ekspozenë para deputetëve, pamë se kryeministri Kurti, që mori mandatin e ri në shtator të këtij viti, dha shumë premtime: paralajmëroi 1 miliard euro për prodhimin dhe industrinë, po ashtu deri në 500 milionë euro investime në Brezovicë, dyfishim të shtesave për fëmijët dhe pagë mesatare mbi 1000 euro në sektorin publik. Fatkeqësisht po vjen të mos merret shumë me sektorin privat, por edhe ato zotime duhet të shoqërohen me afate, financim të përcaktuar dhe tregues të matshëm të rezultateve", tha ai.

Ajo që Qeveria ka publikuar deri tani është Agjenda Legjislative, me projektligjet që synon t’i dërgojë në Kuvend. Për pjesën e mbetur të këtij viti, ekzekutivi ka planifikuar miratimin e më shumë se 60 ligjeve. Zyra e Kryeministrit, e pyetur nga gazeta KOHA nëse programi është vonuar, nëse ka nisur hartimi i tij dhe kur pritet të jetë gati, nuk ktheu përgjigje gjatë së dielës.