ReklamëHapësirë reklame
ReklamëHapësirë reklame
Reklamë
Punëtorë ndërtimi në Nju Xhersi prenë pa dashje një kabllo jetike për kontrollin e trafikut ajror. Pasoja: ndalime në tokë dhe qindra fluturime të vonuara në aeroportet kryesore të bregut lindor, një ditë para hapjes së Asamblesë së Përgjithshme të OKB-së në Nju Jork.
Mjaftoi një kabllo e prerë gabimisht gjatë punimeve në Nju Xhersi që trafiku ajror në bregun lindor të Shteteve të Bashkuara të hynte në kaos. Të hënën pasdite u lëshuan urdhra për ndalim fluturimesh në tokë dhe vonesa për aeroportet në Nju Jork, Pensilvani, Nju Xhersi dhe Masaçusets, pasi u dëmtua lidhja e nevojshme për kontrollin e trafikut ajror.
Sipas zyrtarëve të transportit, dëmtimi goditi sistemin Terminal Radar Approach Control, i cili përdoret për të udhëhequr avionët gjatë ngritjes dhe uljes. Pikërisht ky sistem është nyja që mban të organizuar hapësirën ajrore rreth aeroporteve të mëdha.
Aeroporti Ndërkombëtar Newark Liberty në Nju Xhersi ishte më i goditur nga ndërprerjet, sipas faqes së gjurmimit të fluturimeve FlightAware, e cila raportoi 267 fluturime të vonuara në nisje, ndërsa 257 fluturime të tjera me destinacion Newark-un pësuan gjithashtu vonesa. Të prekur ishin edhe Aeroporti Ndërkombëtar John F. Kennedy dhe LaGuardia në Nju Jork, si dhe Aeroporti Ndërkombëtar i Filadelfias.
Sekretari amerikan i Transportit, Sean Duffy, tha se dëmtimi u shkaktua nga punëtorë të Amtrak, operatorit kombëtar amerikan të shërbimit hekurudhor ndërqytetës, të cilët po kryenin punime ndërtimi në Nju Xhersi. Kjo, shkroi Duffy në rrjetin X, shkaktoi një ndërprerje telekomunikacioni, që detyroi Administratën Federale të Aviacionit (FAA) të ndalonte fluturimet.
Një detaj e bën incidentin edhe më të ndjeshëm: kablloja e prerë ishte në fakt një rrjet rezervë, dhe gabimi u zbulua vetëm pasi dështoi qarku kryesor, sipas zyrtarëve.
Kompania e telekomunikacionit Verizon, pronare e kabllos, deklaroi për mediat amerikane se po punonte për riparimin "sa më shpejt të jetë e mundur" dhe se ajo "nuk mban asnjë përgjegjësi" për incidentin.
Koha e ndërprerjes e rëndon situatën. Të martën nis në Nju Jork Asambleja e Përgjithshme e Kombeve të Bashkuara, ku pritet të marrin pjesë dhjetëra udhëheqës botërorë, shumica prej të cilëve mbërrijnë pikërisht përmes aeroporteve të zonës së Nju Jorkut.
Gurë kalldrëmi të shkulur nga Parku Rinia, gaz lotsjellës dhe mbi 100 të arrestuar: protestat kundër qeverisë në Shqipëri hynë në ditën e shtatë pa asnjë shenjë qetësimi. Kryeministri Rama i quan pjesë të një sulmi të koordinuar, ndërsa protestuesit fajësojnë policinë për dhunën.
