Një i vrarë dhe tre të plagosur në sulmin ndaj anijes iraniane në Ngushticën e Hormuzit

Një anije iraniane e transportit të mallrave u sulmua natën e së dielës pranë ishullit Qeshm, në Ngushticën e Hormuzit. Një person u vra dhe tre të tjerë mbetën të plagosur, njoftoi transmetuesi shtetëror iranian Irib, duke iu referuar të dhënave të guvernatorit të Qeshmit, Hossein Amir Teymouri. Kush qëndron pas sulmit mbetet e paqartë.

Pak më herët, shërbimi britanik i sigurisë detare, UKMTO, kishte raportuar se një anije ishte goditur nga një predhë në Ngushticën e Hormuzit, pa dhënë hollësi të tjera për sulmin.

Incidenti ndodh në një nga korridoret detare më të ndjeshme të planetit. Nëpër Ngushticën e Hormuzit kalon një pjesë vendimtare e eksporteve botërore të naftës, gazit dhe plehrave kimike, dhe çdo goditje aty ndihet menjëherë në tregjet e energjisë.

Si përgjigje ndaj luftës sulmuese të Shteteve të Bashkuara dhe Izraelit, Irani e ka mbyllur kryesisht ngushticën, një masë që ka shtyrë çmimet e energjisë të hidhen ndjeshëm lart. Nga ana tjetër, Uashingtoni pretendon se ka marrë kontrollin e ngushticës. Të dyja palët, si SHBA-ja ashtu edhe Irani, kanë sulmuar anije që sipas tyre kishin tentuar të kalonin pa leje.